27:122  LE  CINQUIESME  SERMON  SUR  LE  CH.  XI.  V.  22.25.  DU  IEUDI  26E  DE  SEPTEMBRE  1555.  Nous  avons  veu  la  promesse  que  faisoit  Moyse  au  peuple,  c'est  assavoir  de  posseder  la  terre  qui  luy  estoit  donnee  en  heritage.  Mais  pource  que  leurs  ennemis  pouvoyent  estre  comme  pour  un  obstacle,  et  sembloit  bien  que  Dieu  n'eust  pas  encores  delibere  d'accomplir  ce  qu'il  avoit  dit:  il  adiouste  que  cest  empeschement  encores  sera  oste.  Et  comment?  d'autant  que  Dieu  mettra  une  frayeur  sur  tous  les  peuples  qu'il  avoit  desia  condamnez,  en  sorte  que  nul  ne  resistera  a  ce  peuple  qui  estoit  ainsi  conduit  par  sa  main.  Voila  en  somme  ce  que  Moyse  a  voulu  dire  en  ce  passage.  Or  c'est  autant  comme  s'il  nous  estoit  declaire  :  Puis  que  Dieu  nous  a  asseurez  d'une  chose,  encores  qu'il  y  eust  toutes  les  difficultez  du  monde,  qu'il  ne  faut  point  que  nous  doutions  de  sa  promesse.  Et  pourquoy?  Car  ce  qui  semblera  impossible  aux  hommes,  il  Ta  en  sa  main,  d'autant  que  nulle  creature  ne  luy  peut  resister.  Et  quand  nous  serons  estonnez  en  concevant  les  obstacles  qui  seront  devant  nos  yeux,  il  faut  que  nous  venions  a  regarder  la  vertu  de  nostre  Dieu  qui  est  pour  surmonter  tout.  Et  ainsi  notons  bien  que  nous  devons  estre  resolus,  que  Dieu  a  le  moyen  de  parfaire  tout  ce  qu'il  a  prononce  de  sa  bouche:  voire  combien  qu'il  nous  semble  que  toutes  approches  luy  soyent  fermees,  il  surmontera  tout  cela  par  sa  vertu.  Et  ainsi  ne  mesurons  point  l'effect  des  promesses  de  Dieu  a  nostre  regard,  et  a  ce  que  nous  concevons  en  nostre  sens  naturel  :  mais  sachons  qu'il  a  tousiours  la  victoire  en  main,  quoy  que  le  monde  s'oppose,  et  tasche  d'empescher  que  ce  qu'il  a  dit  ne  soit  parfaict.  Cependant  nous  devons  appliquer  principalement  ceci  a  nous  confermer,  d'autant  que  nous  voyons  le  diable  estre  tousiours  appareille,  pour  empescher  nostre  salut,  voire  et  pour  le  ruiner  du  tout:  que  nous  ayons  ceste  sentence  imprimee  en  nostre  memoire,  c'est  assavoir  que  Dieu  qui  nous  a  receus  en  sa  grace,  qu'il  nous  a  promis  de  nous  conduire  en  l'heritage  du  royaume  des  cieux,  qu'il  est  le  Dieu  des  armees  et  des  victoires,  et  qu'encores  que  toutes  les  munitions  d'enfer  se  dressent  contre  luy,  que  tout  cela  ne  sera  rien,  que  tout  se  convertira  en  fumee:  et  mesmes  en  ce  monde,  combien  qu'il  nous  faille  soustonir  beaucoup  d'assauts,  et  que  le  Diable  ne  cesse  de  machiner  ceci  et  cela  contre  nous:  soyons  certains  que  Dieu  viendra  bien  a  bout  de  telles  entreprises,  et  que  iamais  nous  ne  serons  vaincus,  moyennant  qu'il  soit  de  nostre  coste  :  comme  il  nous  en  a  certifiez,  moyennant  que  nous  demeurions  sous  sa  protection.  Et  puis  ceci  ne  s'entend  pas  seulement  de