21:122  Gallorum  facile  princeps  Petrus  Stella  docebat,  mirum  quantopere  brevi  tempore  profecerit:  adeo  quidem  ut,  quum  saepissime  obiret  ipsorum  doctorum  vices,  doctor  potius  quam  auditor  haberetur,  eique  discedenti  doctoratus  insignia  absque  ullo  pretio,  summo  docentium  omnium  consensu  quasi  optime  de  Academia  merito  offerrentur.  Interea  tamen  ille  sacrarum  literarum  studium  simul  diligenter  excolere,  in  quo  tantum  etiam  promoverat  ut  quicunque  in  ea  urbe  aliquo  purioris  religionis  cognoscendae  studio  tangebantur  ad  eum  etiam  percontandum  ventitarent,  eiusque  tum  eruditionem  tum  ardorem  magnopere  admirarentur.  Testantur  autem  nonnulli  adhuc  superstites,  qui  tum  ei  familiares  et  contubernales  fuerunt,  consuevisse  illum  per  id  tempus,  postquam  frugaliter  admodum  coenasset,  ad  mediam  usque  noctem  lucubrare,  mane  vero  experrectum,  quae  legisset  in  lecto  aliquamdiu  meditari  velutique  concoquere,  nec  facile  in  ea  meditatione  passum  interpellari.  Quibus  continuatis  vigiliis  ille  quidem  solidam  eruditionem  et  excellentem  memoriam  est  consequutus,  sed  illam  vicissim,  ut  verisimile  est,  ventriculi  imbecillitatem  contraxit,  quae  varios  ipsi  morbos  et  tandem  etiam  intempestivam  mortem  attulit.  Erat  tum  Academiae  Bituricensis  magna  celebritas,  quod  eo  evocatus  ex  Italia  iurisconsultus  aetatis  suae  facile  princeps  Andreas  Alciatus  venisset,  quem  sibi  quoque  Ioannes  noster  audiendum  putavit.  Itaque  quum  eo  migrasset,  amicitiam  iniit  et  religionis  et  literarum  nomine  cum  Melchiore  Wolmaro  Germano  Rotuillensi,  Graecarum  literarum  publico  tum  illic  professore:  cuius  maxime  viri  eo  libentius  memini,  quod  eundem  ego  a  prima  pueritia  ad  pubertatem  usque  praeceptorem  unicum  habui,  cuius  doctrinam,  pietatem  caeterasque  virtutes  admirabilem  denique  in  erudienda  iuventute  dexteritatem  nunquam  satis  possim  praedicare.  Hoc  autore  et  adiutore  Calvinus  Graecas  literas  didicit,  cuius  beneficii  memoriam  omnibus  postea  testatam  esse  voluit,  consecratis  ipsius  nomini  commentariis  quos  in  alteram  ad  Corinthios  epistolam  edidit.  In  his  igitur  studiis  versantem,  ita  tamen  ut  sacras  literas  assidue  [fol.  II.  2.]  tereret,  adeoque  nonnullas  interim  conciones  in  agro  Biturigum,  in  oppidulo  quod  Linerias  vocant,  praesente  et  probante  illius  domino  haberet,  repentina  mors  patris  nunciata  in  patriam  revocavit.  Inde  paulo  post  Lutetia  transiens,  quum  annum  ageret  vigesimum  quartum,  egregium  illum  commentarium  scripsit  in  Senecae  libellum  de  Clementia:  quo  scriptore  gravissimo  et  ipsius  Calvini  moribus  plane  conveniente  valde  delectatum  eum  fuisse  constat.  Ibi  paucis  mensibus  innotuit  omnibus  purioris  religionis  studiosis,  inter  quos  frequenter  postea  non  sine  insigni  pietatis  testimonio  commemorantem  eum  audivimus  Stephanum  Por-