20:122  principibus  insidiae  periculosiores,  qui  omnibus  et  lautitiis  et  delitiis  ita  affluunt  ut  mirum  sit  non  in  lasciviam  prorsus  diffluere?  Nam  certe  naturae  propemodum  repugnat  copiis  voluptatum  sine  voluptate  perfrui.  Inter  delitias  vero  illibatam  manere  castitatem  quam  difficile  sit  plus  satis  usu  patet.  Tu  vero,  illustrissime  Princeps,  quidquid  ad  voluptatum  seminarium  pullulat  venenum  puta.  Nam  si  te  iam  demulceat  quod  continentiam  et  temperantiam  suffocat,  quid  non  adultus  concupisceres?  Asperior  forte  est  haec  sententia,  magnam  corporis  curam  esse  magnam  virtutis  incuriam  :  verissime  tamen  ita  loquutus  est  Cato.  Hoc  quoque  paradoxum  vix  forte  admittet  communis  vita:  Maior  sum  et  ad  maiora  genitus  quam  ut  mancipium  sim  corporis  mei,  cuius  contemptus  certa  est  mea  Ubertas.  Facessat  ergo  immodicus  rigor  quo  omnis  iucunditas  tollitur  e  vita:  sed  quam  lubricus  ex  securitate  et  indulgentia  ad  proterviendi  licentiam  sit  lapsus,  nimis  multa  exempla  demonstrant.  Quanquam  tibi  non  cum  luxuria  modo  sed  cum  aliis  compluribus  vitiis  bellandum  erit.  Tua  comitate,  modestia,  verecundia  nihil  suavius:  sed  nullum  est  tam  mansuetum  ac  compositum  ingenium  quod  assentationibus  inebriatum  non  ad  feritatem  et  truculentiam  degeneret.  Iam  quum  innumeri  adulatores  totidem  sint  ad  inflammandum  variis  libidinibus  tuum  animum  flabella,  quanto  te  ad  cavendum  acrius  intendere  convenit?  Nec  vero,  dum  te  admoneo  de  aulicis  blanditiis,  aliud  postulo  quam  ut  moderatione  instructus  te  inexpugnabilem  praebeas.  Vere  enim  ille:  non  esse  in  laude  ponendum  si  quis  Asiam  nunquam  viderit,  verum  summa  laude  dignum  si  quis  pudice  et  continenter  in  Asia  vixerit.  Id  quum  assequi  maxime  sit  optabile,  facile  compendium  praescribit  David,  si  modo  imiteris  eius  exemplum,  dum  praecepta  Dei  suos  consiliarios  esse  praedicat.  Et  certe  quidquid  aliunde  consilii  suggeratur,  nisi  hinc  sapiendi  facias  exordium,  evanescet.  Superest  itaque,  generosissime  Princeps,  ut  quod  de  sancto  rege  Ezechia  apud  Isaiam  legitur  subinde  tibi  in  mentem  recurrat  Praeclaras  enim  eius  dotes  enumerans  propheta  hoc  maxime  elogio  eum  commendat,  quod  thesaurus  eius  erit  Dei  timor.  Vale,  illustris*  sime  Princeps.  Deus  te  suo  praesidio  tueatu/r  incolumem,  donis  spiritualibus  magis  ac  magis  exornet  omnique  benedictionum  genere  locupletet.  Genevae  pridie  Calendas  Augusti  M.  D.  LXIII