6:121  CATECHISMUS  GENEVENSIS.  LE  MINISTRE.  Comment  monstreras  tu  qu'il  n'y  a  point  d'inconvenient  en  cela?  L'ENFANT.  Pource  que  la  Circoncision  estoit  aussi  bien  Sacrement  de  penitence:  comme  Moyse  et  les  Prophetes  declairent  (Deut.  10,  16  et  30,  6;  Ier.  4,  4):  et  Sacrement  de  Foy,  comme  dit  sainct  Paul  (Rom.  4,  l  l  )  .  Et  toutesfois  Dieu  n'en  a  excluz  les  petis  enfans.  LE  MINISTRE.  Mais  pourras-tu  bien  monstrer  qu'il  y  ait  uno  mesme  raison,  de  les  recevoir  au  Baptesme  comme  a  la  Circoncision?  L'ENFANT.  Ouy  bien.  Car  les  promesses  que  Dieu  avoit  anciennement  faict  a  son  peuple  d'Israel,  sont  maintenant  estendues  par  tout  le  monde.  LE  MINISTRE.  Mais  s'ensuit-il  de  cela,  que  nous  devions  user  du  signe?  L'ENFANT.  Il  est  ainsi,  quand  le  tout  sera  bien  considere.  Car  Iesus  Christ  ne  nous  a  pas  faict  participans  de  la  grace  qui  avoit  au  paravant  este  au  peuple  d'Israel,  pour  ramoindrir  en  nous,  ou  la  rendre  plus  obscure  qu'elle  n'estoit.  Mais  plustost  l'a  esclarcie,  et  augmentee  d'advantage.  LE  MINISTRE.  Entens-tu  que  si  nous  ne  donnions  le  Baptesme  [fol.  62]  aux  petis  enfans,  que  la  grace  de  Dieu  seroit  amoindrie  par  la  venue  du  Seigneur  Iesus?  L'ENFANT.  Ouy  bien.  Car  le  signe  de  la  bonte  et  misericorde  de  Dieu  sur  noz  enfans,  qu'ont  eu  les  Anciens,  nous  defauldroit:  lequel  sert  grandement  a  nostre  consolation,  et  a  confermer  la  promesse  qui  a  este  faicte  des  le  commencement.  LE  MINISTRE.  Tu  entens  donc,  puis  que  Dieu,  se  declairant  anciennement  estre  Sauveur  des  petis  enfans,  a  voulu  ceste  promesse  estre  seellee  en  leurs  corps  par  Sacrement  exterieur,  que  c'est  bien  raison  qu'il  n'y  ait  pas  moins  de  confirmation  depuis  la  venue  de  Christ:  veu  que  la  mesme  promesse  demeure,  et  mesme  est  plus  clairement  testifiee  de  parolle,  et  ratifiee  de  faict.  L'ENFANT.  Ouy.  Et  d'advantage,  puis  que  c'est  chose  notoire  que  la  vertu  et  la  substance  du  Baptesme  appartient  aux  petis  enfans,  on  leur  feroit  iniure,  de  leur  denier  le  signe  qui  est  inferieur.