7:120  peut  nullement  estre  esteincte?  Et  c'est  ce  qu'il  dict  en  un  autre  passage:  Ceste  est  la  volunte  de  mon  Pere,  que  quiconque  croit  au  filz  ne  perisse  point,  mais  ait  la  vie  eternelle,  et  ie  le  ressusciteray  au  dernier  iour  (Iehan  6,  40).  Item,  quiconque  mange  ma  chair  et  boit  mon  sang  a  la  vie  eternelle,  et  ie  le  ressusciteray  au  dernier  iour  (ibid.  v.  54).  Nottons  qu'il  nous  promet  deux  choses:  la  vie  eternelle,  et  la  resurrection.  Les  Anabaptistes  prennent  l'un  de  ces  deux  membres,  et  laissent  l'autre,  comme  si  on  les  pouvoit  diviser.  Il  parle  encore  plus  clairement  ailleurs,  en  disant:  Ie  suis  la  resurrection  et  la  vie,  qui  croit  en  moy,  encore  qu'il  fust  mort,  il  vivra:  et  quiconque  vit  et  croit  en  moy,  il  ne  mourra  iamais  (Iehan  ll,  25).  Item,  quiconque  garde  ma  parolle,  il  ne  verra  iamais  la  mort  (Iehan  8,  51).  Ie  vous  prie,  sauroit-on  dire  chose  plus  claire  que  cela?  Et  un  Chrestien  doit-il  desirer  plus  ferme  tesmoignage  [page  146]  pour  appuyer  seurement  sa  conscience?  Quelcun  possible  m'obiectera,  que  cela  n'est  que  des  fideles.  Ie  le  confesse,  et  aussi  quant  a  moy  il  me  suffist  d'instruire  les  enfans  de  Dieu,  quelle  sera  leur  condition  apres  la  mort.  Combien  que  des  reprouvez  il  en  sera  parle  cy  apres.  Mais  pour  le  present,  nous  voyons  que  nous  promet  Iesus  Christ,  si  nous  sommes  siens.  C'est  que  au  milieu  de  la  mort  nostre  vie  spirituelle  ne  sera  point  interrompue.  Mais,  qui  plus  est,  sainct  Paul  monstre  que  c'est  lors  qu'elle  commence  d'estre  en  sa  plus  grande  vigueur.  Comme  nostre  homme  exterieur,  dit-il,  est  corrumpu,  aussi  l'interieur  se  renouvelle  de  iour  en  iour  (2  Cor.  4,  16).  Par  ces  motz  il  monstre  que  d'autant  que  la  vie  presente  decline  et  devient  caduque,  la  vie  de  l'ame  croist  et  se  fortifie  de  plus  en  plus.  C'est  bien  donc  au  rebours  de  ceste  sentence,  d'estimer  que  l'ame  soit  esteincte,  quand  la  vie  corporelle  prend  fin.  Ie  deduiray  encore  cest  argument  plus  au  long.  Nous  devons  croistre  et  profiter  iournellement  en  nostre  Seigneur,  nous  avancant  pour  approcher  tousiours  de  luy,  comme  si  nous  marchions  auiourdhuy  un  pas,  et  demain  l'autre,  ou  comme  si  nous  montions  par  degrez.  Or  il  est  dict  pour  le  [page  147]  temps  present,  que  nous  cheminons  en  la  clairte  de  son  visage  (Ps.  89,  16).  Item,  que  son  Esprit  nous  rend  tesmoignage  que  nous  sommes  ses  enfans  (Rom.  8,16).  Si  ainsi  est  qu'en  la  mort  nous  perdions  ceste  clairte  et  fiance  que  nous  donne  le  sainct  Esprit,  c'est  bien  loing  de  nous  avancer.  Semblablement  sainct  Paul  dict,  que  combien  que  nous  conversions  en  ce  monde,  toutesfoys  nostre  habitation  est  au  ciel  (Phil.  3,  20).  Regardons  si  la  mort  nous  doit  chasser  hors  du  Royaume  de  Dieu,  au  lieu  que  paravant  nous  y  avions  nostre  demeure  par  esperance.  Il  est  certain  que  ce  corps