58:120  dant,  quand  il  les  expose  a  fascheries  et  a  molestes,  il  leur  convertit  aussi  cela  en  bien.  Il  nous  faut  tenir  ceste  regle,  Que  toutes  les  graces  que  nous  recevons  en  ce  monde  de  la  main  de  Dieu,  sont  coniointes  avec  quelques  fascheries,  et  qu'il  n'y  a  iamais  du  miel  pur,  mais  il  y  a  du  vinaigre  quant  et  quant  mesle.  Dieu  pourroit  bien  tenir  un  autre  moien,  si  bon  lui  sembloit:  mais  il  nous  faut  assuiettir  a  lui,  et  trouver  bon  ce  qu'il  fait,  encores  que  nostre  sens  repugne  a  l'encontre,  et  les  cupiditez  de  nostre  chair.  Il  est  vrai  qu'un  homme  qui  seroit  bien  avise,  ne  poursuivroit  iamais  d'estre  riche,  ni  oppulent:  moiennant  qu'il  eust  dequoy  estre  nourri  et  vestu,  il  ne  cercheroit  autre  condition.  Tant  y  a  que  Dieu  exercera  les  uns  par  povrete,  et  les  autres  il  les  eslargira:  et  le  povre  et  le  riche  pourront  estre  fideles,  et  tous  deux  enfans  de  Dieu.  Ie  ne  parle  pas  de  tous  en  general  :  mais  nous  voions  qu'il  y  a  des  gens  craignans  Dieu,  qui  ne  sont  point  d'estat  pareil  ni  egal.  Les  uns  auront  du  bien  pour  s'entretenir,  voire  avec  quelque  dignite  entre  les  hommes:  les  autres  a  grand  peine  auront  ils  du  pain  a  manger.  Or  si  c'estoit  a  nous  a  y  mettre  loy,  nous  voudrions  que  Dieu  usast  d'une  mesure  egale  et  pareille  :  voire  mais  il  sait  pourquoy  il  choisit  plustost  une  telle  diversite.  C'est  a  nous  donc  (comme  i'ay  dit)  d'acquiescer  a  son  vouloir.  Et  ainsi  quand  il  lui  plaist  de  faire  tellement  prosperer  ses  serviteurs,  qu'on  cognoist  que  vraiement  sa  benediction  reside  en  leurs  personnes,  c'est  un  tesmoignage  de  sa  bonte:  et  ils  en  doivent  faire  leur  profit.  Mais  quand  il  y  a  quelque  aigreur  meslee  parmi,  ils  doivent  penser,  Dieu  ne  veut  point  que  ie  m'endorme,  ne  que  ie  m'arreste  tellement  a  ces  benefices  terriens,  que  cela  me  face  oublier  la  vie  celeste.  Il  faut  donc  que  les  fideles  aient  ceste  prudence  et  consideration  en  eux,  que  tousiours  ils  sachent  faire  leur  profit  des  biens  que  Dieu  leur  donne:  et  cependant,  qu'ils  n'oublient  point  la  grace  qu'il  leur  a  monstree,  combien  qu'ils  aient  des  angoisses,  des  solicitudes,  des  molestes,  et  outrages,  qui  leur  seront  faits  du  coste  des  hommes.  Et  mesme  ici,  tant  les  riches  que  les  povres,  sont  enseignez  de  leur  devoir.  Quand  un  homme  sera  afflige  de  povrete  et  disette,  si  est  ce  qu'encores  Dieu  ne  permettra  point  qu'il  soit  tellement  destitue,  qu'il  n'ait  tousiours  quelque  petite  portion,  pour  sentir  que  Dieu  a  le  soin  de  lui.  Il  ne  faut  point  donc,  quand  les  fideles  n'ont  pas  tout  ce  qu'ils  pourroient  souhaiter:  mais  que  Dieu  les  laisse  la  quasi  comme  defaillir  :  il  ne  faut  pas  pourtant  qu'ils  murmurent  a  l'encontre  de  lui,  ne  qu'ils  estiment  qu'il  les  ait  reiettez:  mais  si  peu  qu'il  leur  donne  (voire  tant  peu  que  ce  soit)  il  faut  qu'ils  appliquent  cela  a  gouster  la  bonte  de  Dieu,  tellement  qu'ils  le  puissent  invoquer  comme  leur  Pere,  et  esperer  en