51:120  Dieu  ni  reverence  a  sa  parole  qui  cependant  feront  des  grands  zelateurs,  et  neantmoins  ce  sera  pour  appasteler  les  poures  ames,  voire  pour  les  estrangler  par  maniere  de  dire,  d'autant  plus  nous  faut-il  bien  noter  ce  qui  est  ici  declare  par  sainct  Paul,  c'est  a  scavoir  quand  nous  voyons  que  ceux  qui  crient  et  tempestent,  ne  font  rien  de  tout  ce  qu'ils  disent,  que  nous  soyons  sur  nos  gardes,  et  que  nous  scachions  a  quoy  tendent  ceux  qui  nous  enseignent.  Il  est  vray  que  si  un  homme  fait  tout  au  rebours  de  ce  qu'il  dira,  que  la  parole  de  Dieu  pour  cela  ne  doit  point  perdre  son  authorite  envers  nous:  car  ce  n'est  pas  raison  que  si  un  homme  est  meschant,  que  Dieu  pour  cela  soit  deboute  de  son  souverain  empire.  Et  quand  un  homme  menera  vie  dissolue,  qu'il  fera  quelque  lasche  tour,  cependant  qu'il  aura  fidelement  presche,  il  ne  faut  point  que  cela  derogue  a  la  doctrine  celeste.  Si  un  homme  qui  est  muable,  change  et  varie,  ou  bien  qu'il  soit  un  hypocrite,  et  qu'il  ne  responde  point  quant  a  la  vie  a  ce  qu'il  a  prononce  de  sa  bouche,  il  ne  faut  point  que  la  verite  de  Dieu  soit  amoindrie  envers  nous  pour  cela:  mais  ie  di  maintenant  que  toutesfois  et  quantes  que  nous  verrons  gens  qui  font  des  grands  zelateurs,  et  cependant  se  permettent  tout,  et  se  donnent  licence  de  faire  tout  le  contraire  de  ce  qu'ils  ont  presche,  que  nous  devons  considerer  et  avoir  ceste  discretion  de  n'estre  point  menez  a  la  pipee,  et  de  n'estre  point  trainez  par  le  nez:  mais  que  nous  cognoissions  quelle  est  leur  doctrine,  que  nous  en  facions  un  bon  examen  et  vif.  Or  quand  nous  y  procederons  ainsi,  nous  verrons  que  la  doctrine  des  Papistes  n'est  sinon  une  couverture  qu"ils  prennent  pour  se  tenir  paisibles  quant  au  monde  et  selon  Dieu  qu'il  ne  leur  chaut  comme  les  choses  aillent:  car  ils  ne  souffriroyent  nuls  changemens,  sinon  qu'ils  ne  veulent  point  s'exposer  a  nulle  haine:  car  ils  craignent  tousiours  de  se  tormenter  et  avoir  quelque  fascherie.  Quand  nous  voyons  cela,  ce  nous  est  une  marque  infallible  pour  nous  donner  garde  de  toutes  les  embusches  de  Satan,  en  sorte  que  nous  ne  pourrons  pas  estre  trompez,  sinon  a  nostre  escient,  comme  nous  avons  declare.  Au  reste  sainct  Paul  adiouste,  que  telles  gens  se  veulent  glorifier  en  la  chair  des  simples.  Il  est  bien  certain  qu'il  regarde  ici  a  ce  signe  de  la  Circoncision,  comme  s'il  disoit,  ils  vous  veulent  ici  imprimer  leur  marque,  pour  dire,  Nous  les  avons  gagne:  mais  c'est  pour  les  rendre  tant  plus  detestables  quand  ils  abusent  ainsi  du  signe  que  Dieu  avoit  donne  pour  ratifier  son  adoption  qu'il  avoit  faite  avec  la  lignee  d'Abraham,  et  corrompent  son  vray  usage  et  legitime.  Car  Dieu  avoit  commande  que  les  Iuifs  fussent  circoncis.  Et  pourquoy?  Afin  qu'ils  vissent  que  tout  le  genre  humain  est  maudit.