50:120  praecones  sunt  suae  excellentiae.  Interea  quum  gloriam  eorum  in  verbis  et  iactantia  sitam  esse  admonet,  ostendit  quam  sint  futiles  ac  putidi.  Sibi  vero  rem  pro  verbis,  hoc  est,  veram  et  solidam  gloriae  materiam  vendicat.  Terum  in  quo  alios  reprehendit,  videtur  ipse  quoque  peccare:  nam  se  ipsum  mox  commendat.  Respondeo,  finem  esse  considerandum:  neque  enim  sui  ipsorum  commendationi  student,  qui  omni  ambitione  vacui  utiliter  duntaxat  servire  Domino  cupiunt.  Quod  tamen  ad  hunc  locum  spectat,  non  est  opus  alia  solutione  quam  quae  ex  ipsis  verbis  sumi  potest.  Nam  illi  se  ipsos  dicuntur  commendare,  qui  verae  laudis  inopes  ac  ieiuni,  se  thrasonice  efferendo,  mentiuntur  se  esse  quod  non  sunt.  Quod  etiam  patet  ex  sequentibus.  Verum  ipsi  in  se  ipsis.  Hic  eorum  ineptias  digito  ostendit.  Luscus  inter  caecos  acute  videt:  surdaster  clare  audit  inter  plane  surdos.  Tales  erant  isti,  qui  ideo  sibi  placebant  et  se  venditabant  inter  alios,  quod  praestantiores  non  respicerent.  Nam  si  contulissent  se  cum  Paulo  vel  aliquo  simili,  stolidam  illam  persuasionem  mox  deponere  coacti  fuissent,  atque  ex  iactantia  versi  fuissent  in  pudorem.  Huius  loci  expositio  non  aliunde  petenda  est  quam  a  monachis.  Nam  quum  sint  omnes  fere  indoctissimi  asini,  et  tamen  oblongae  vestis  et  cuculli  causa  docti  censeantur  :  si  quis  tenuem  modo  gustum  elegantioris  literaturae  habeat,  plumas  suas  instar  pavonis  fastuose  extendit:  spargitur  de  eo  mirabilis  fama,  adoratur  inter  sodales.  At  si  seposita  cuculli  larva  ventum  fuerit  ad  iustum  examen,  deprehenditur  vanitas.  Cur  hoc?  verum  quidem  est  vetus  proverbium,  audax  inscitia:  sed  inde  praecipue  monachalis  insolentissimus  ille  fastus,  quod  se  metiuntur  ex  se  ipsis:  nam  quum  in  eorum  claustris  nihil  sit  praeter  barbariem,  illic  nihil  mirum  si  regnet  luscus  inter  caecos.  Tales  erant  isti  Pauli  aemuli:  sibi  enim  intus  plaudebant,  non  considerantes  quibus  virtutibus  constaret  vera  laus,  quantumque  a  Pauli  et  similium  excellentia  distarent.  Haec  siquidem  una  cogitatio  rubore  illos  merito  suffudisset.  Verum  haec  iusta  est  ambitiosorum  poena,  ridiculos  fieri  sua  ineptudine  (quo  nihil  magis  fugiunt),  ac  pro  gloria,  quam  praepostere  affectant,  dedecus  reportare.  13.  Nos  autem  non  sine  modo.  Nunc  suam  moderationem  pseudoapostolorum  opponit  stultitiae:  et  simul  ostendit  quis  sit  verus  modus  gloriandi  :  nempe  quum  nos  continemus  intra  fines  a  Domino  signatos.  Hoc  mihi  dedit  Dominus,  hac  mensura  contentus  ero,  nihil  amplius  vel  appetam,  vel  mihi  sumam.  Id  vocat  mensuram  suae  regulae.  Haec  enim  cuiusque  est  regula,  ad  quam  exigere  se  debet,  donum  et  vocatio  Dei.  Quamquam  ne  in  vocatione  quidem  ac  dono  Dei  nobis  gloriari  fas  est  nostra