30:120  Deo,  cui  dictorum  factorumque  uni  reddenda  ratio  est,  simplicitatem  nostram  probari,  quod  verbum  ipsius  nostrarum  omnium  actionum  normam  et  regulam  habemus  et  admittimus:  cuius  contra  contemptus  contumacibus  et  refractariis  ultimum  exitium  est  allaturus.  Iam  vero  si  quis  ad  istam  amussim  cultum  illum  omnem  exigat  quo  papistae  sibi  devincire  Deum  arbitrantur,  meram  rebellionem  in  eo  esse  reperiet.  Exempli  gratia  expendamus  sacrosanctum  coenae  sacramentum.  Dominus  noster  Iesus  Christus  panem  frangi  iussit,  et  acceptum  poculum  distribuit  adhibendum.  Accipite,  inquit,  comedite  ex  hoc  pane,  et  bibite  ex  hoc  calice  inter  vos  omnes.  Et  quidem,  inquam,  omnes.  Quid  hic  papistae?  Primum  uni  sacrificulo  poculum  reservarunt,  et  ita  coena  discerpta  est.  Plebs  enim  abstinere  poculo  iussa  est,  et  ita  parte  coenae  privata.  Quasi  vero  Christus  vita  nostra  sit  ex  parte  tantum.  At  ille  nos  docet  se  nobis  esse  cibum  et  potum,  quum  carnem  suam  nobis  in  cibum  praebet,  et  sanguinem  in  potum.  Verum  enimvero  plebs  apud  papistas  arcetur  poculo  unus  sacrificulus  sanguini  Domini  communicat.  Quid  ergo  istud  rei  est?  Sed,  aiunt,  non  sine  ratione  istud,  periculum  enim  est,  ne  accedente  ad  poculum  plebe  aliqua  sanguinis  gutta  in  terram  decidat.  Verum,  obsecro,  nonne  Dei  filius,  cuius  sapientia  est  inenarrabilis,  suam  voluntatem  manifeste  declaravit,  et  significantissimis  verbis  exposuit?  Anne  igitur  mortales  homunciones  et  humi  repentes  lumbrici  suam  bonam  intentionem  Domini  praeceptis  opponent?  Deinde  vero  videte  papisticam  arrogantiam  :  Christus  enim  vult  in  coenae  sacramento  fidelibus  singulis  exhibere  sancti  sui  spiritus  gratias,  et  omnium  suorum  bonorum  ipsos  facere  participes,  suum  corpus  et  suum  sanguinem  ipsis  communicans:  illi  vero  miseris  persuadent  se  offerre  Christum  Deo  patri  in  oblationem  pro  vivis  et  mortuis.  Quid  ita?  Neque  enim  Christus  dicit:  Offerte,  sed  Accipite.  Quanta  vero  in  istis  repugnantia?  Quam  ergo  hic  coram  Deo  tandem  excusationem  adferent,  qui  hominum  longe  dissimillimus  est?  Nae  videntur  isti  veluti  cornubus  ipsius  Dei  maiestatem  petere,  et  velut  ad  certamen  provocare,  quasi  dicerent:  Te  invito  sacrificium  istud  offerimus  in  peccatorum  nostrorum  satisfactionem:  et  tibi  gratum  et  acceptum  illud  esse  necesse  est.  Quo  posito,  gesticulator  ille  sacrificulus  fabulam  agit,  et  pro  eo  quod  Dominus  noster  Iesus  Christus  dixit  Accipite  et  comedite,  ille  Deum  suum  fictitium  in  tres  partes  dividit,  quarum  maximam  sibi  vendicat,  aliam  vivis  et  mortuis  attribuit,  tertiam  in  vinum  intingit,  poculumque  deinde  exhaurit  :  spectante  interea  populo  attonito,  et  instar  trunci  stupido,  totam  hanc  fabulam.  Peracta  denique  ita  fabula  quisque  recedit,  pulchre  a  Deo  pro  suis  pec-