27:120  en  ce  passage,  qu'il  nous  coustera  bien  cher,  d'avoir  este  ainsi  advertis  de  Dieu,  et  de  n'avoir  point  escoutte  la  remonstrance  qu'il  nous  faisoit.  Que  donc  nous  soyons  songneux  a  tousiours  reduire  en  memoire  la  parolle  de  Dieu,  sachans  qu'encores  que  nous  y  ayons  bien  profite,  nous  sommes  au  chemin,  et  qu'il  nous  faut  passer  plus  outre:  et  que  ce  n'est  point  assez  d'avoir  cogneu  pour  un  coup,  mais  qu'il  faut  que  la  memoire  nous  soit  refreschie  assiduellement,  et  que  Dieu  nous  sollicite,  ou  autrement  nous  serons  tantost  esgarez.  Que  donc  nous  pensions*a  cela,  et  puis  qu'un  chacun  regarde  a  la  charge  qui  luy  est  commise.  Que  ceux  qui  ont  des  enfans,  qu'ils  les  instruisent  en  la  crainte  de  Dieu,  et  que  ce  soit  leur  principal  soin:  car  c'est  aussi  l'heritage  meilleur  qu'ils  leur  puissent  laisser:  qu'il  faudra  autrement,  combien  qu'ils  les  facent  riches,  et  qu'ils  les  mettent  en  bon  train,  que  tout  s'en  aille  en  ruine.  Car  Dieu  maudira  le  tout,  si  ce  fondement  ici  n'y  est,  c'est  assavoir  qu'il  y  ait  une  pure  religion.  Car  cependant  que  nostre  Seigneur  parle  et  du  coucher  et  du  lever,  quand  il  parle  du  repos  et  du  travail,  ce  n'est  point  sans  cause:  car  il  monstre  que  nous  avons  besoin  d'estre  aidez  par  tous  moyens  a  reduire  en  memoire  la  Loy  de  Dieu.  Et  au  reste,  les  occasions  nous  doivent  picquer,  et  inciter  a  cela,  quand  nous  voyons  qu'en  toutes  sortes  nous  sommes  divertis  de  la  memoire  de  nostre  Dieu,  sinon  qu'on  nous  la  remette  au  devant  par  les  aides  qu'il  nous  monstre  ici.  En  premier  lieu  donc  quand  il  est  dit:  Vous  allant  coucher  le  soir,  et  vous  levant  de  matin,  il  nous  monstre  que  nous  pouvons  bien  nous  reposer,  et  penser  a  toutes  nos  necessitez  corporelles,  que  l'homme  pourra  bien  cercher  son  re*  pos  quand  il  sera  las  d'avoir  travaille,  d'avoir  vaque  tout  au  long  du  iour  a  ses  affaires:  mais  si  nous  avons  un  tel  soin  de  cercher  le  repos  du  corps,  n'est-il  pas  dit  que  le  repos  des  ames  est  d'ouyr  la  voix  de  Dieu?  Or  si  on  dit:  Ie  n'ay  point  le  loisir.  Et  n'as-tu  point  loisir  de  te  lever  de  matin?  et  puis  quand  tu  viens  a  te  mettre  a  table  pour  prendre  ton  repas,  n'y  a-il  point  assez  de  temps  pour  t'edifier  en  la  crainte  de  Dieu?  Et  puis  en  travaillant  tout  au  long  du  iour,  ou  bien  quand  on  ira  par  le  chemin,  faut-il  cependant  que  Dieu  soit  mis  en  oubli?  Mais  quoy?  Voila  comme  les  hommes  sont  tousiours  empeschez,  quand  il  est  question  de  venir  a  Dieu.  Il  est  vray  qu'il  nous  est  bien  facile  de  cercher  des  excuses  frivolles  dont  nous  contenterons  les  hommes:  mais  quand  Dieu  nous  declaire:  Or  ca,  que  pouvez-vous  faire  en  toute  vostre  vie?  estes-vous  tant  empeschez,  que  vous  ne  puissiez  vous  appliquer  quelque  peu  de  temps  pour  vous  exercer  en  ma  parolle?  Ie  vous  donne  assez  bon  loisir  de  vacquer  a  vos  necessitez,  et  cepen-