47:12  testatem  hanc  dari  evangelista  pronuntiat  iis  qui  iam  credunt.  Atqui  certum  est,  re  ipsa  iam  esse  Dei  filios.  Fidei  ergo  nimis  derogant,  qui  tantum  hoc  credendo  consequi  hominem  dicunt  ut  filius  Dei  fiat  si  velit,  quia  praesentis  effectus  loco,  suspensam  potentiam  statuunt.  Crassior  adhuc  repugnantia  apparet  in  eo  quod  statim  sequitur.  Dicit  evangelista  iam  ex  Deo  esse  natos,  qui  credunt.  Non  ergo  facultas  tantum  eligendi  offertur,  quum  iam  id  ipsum,  de  quo  agitur,  obtineant.  Etsi  autem  Hebraeis  nomen  pro  virtute  saepe  accipitur,  hic  tamen  relatio  est  ad  evangelii  doctrinam.  Tunc  enim  demum  in  Christum  credimus,  quum  nobis  praedicatus  est.  Loquor  de  ordinaria  ratione,  qua  nos  Dominus  ad  fidem  adducit,  Idque  diligenter  notandum  est,  quia  sibi  multi  confusam  sine  ulla  doctrinae  intelligentia  fidem  stulte  fabricant.  Quemadmodum  apud  papistas  credendi  verbo  nihil  magis  tritum,  ubi  tamen  nulla  est  ex  evangelii  auditu  Christi  notitia.  Ergo  Christus  per  evangelium  se  nobis  offert,  nos  autem  fide  eum  recipimus.  13.  Qui  non  ex  sanguine.  Quod  oblique  hic  pravam  Iudaeorum  confidentiam  perstringi  quidam  putant,  libenter  amplector.  Habebant  illi  semper  in  ore  generis  sui  dignitatem,  quasi  ex  sancta  progenie  orti,  naturaliter  sancti  essent.  Et  merito  gloriati  fuissent  Abrahae  genere,  si  legitimi  filii,  ac  non  degeneres  fuissent:  at  fidei  gloriatio  nihiL  prorsus  carnali  geniturae  arrogat,  sed  uni  Dei  gratiae  fert  acceptum  quidquid  est  boni.  Dicit  ergo  Ioannes,  qui  ex  gentibus  ante  immundis  Christo  credunt,  non  ex  utero  nasci  Dei  filios,  sed  a  Deo  refingi,  ut  esse  incipiant.  Sanguinem  videtur  posuisse  in  numero  plurali,  quo  longam  generis  successionem  melius  exprimeret.  Nam  haec  pars  erat  iactantiae  apud  Iudaeos,  continua  serie  posse  originem  suam  referre  usque  ad  patriarchas.  Carnis  voluntas  et  viri,  idem  mihi  significat.  Cur  enim  caro  pro  muliere  sumatur  (quemadmodum  multi  cum  Augustino  volunt),  ego  non  video.  Potius  rem  unam  diversis  verbis  repetens  evangelista,  eam  melius  inculcat  et  altius  mentibus  infigit.  Tametsi  autem  Iudaeos,  qui  in  carne  superbiebant,  proprie  respicit,  ex  hoc  tamen  loco  generalis  doctrina  colligi  potest:  quod  filii  Dei  censemur,  non  esse  hoc  naturae  nostrae  proprium,  neque  ex  nobis  proficisci,  sed  quia  Dominus  voluntarie  nos,  hoc  est  gratuito  amore  genuit.  Hinc  primo  sequitur,  fidem  ex  nobis  non  provenire:  sed  spiritualis.regenerationis  esse  fructum.  Negat  enim  evangelista  posse  quemquam  credere,  nisi  qui  ex  Deo  genitus  est:  coeleste  ergo  donum  est  fides.  Deinde,  fidem  non  frigidam  esse  nudamque  notitiam,  quum  nullus  credere  possit,  nisi  Dei  spiritu  reformatus.  Videtur  tamen  evangelista  praepostere  regenerationem  fide  facere  priorem,  quum  potius  effectus  sit  fidei,  ideoque  posterior.  Respondeo,  utrum-  12