45:12  qua  iniunctum  sibi  a  Deo  munus  singuli  possent  obire.  Templi  nomen  hic  pro  sancto  accipitur:  quod  ideo  notandum  est,  quia  aliquando  atrium  etiam  comprehendit.  Zacharias  autem  in  templum  ingressus  dicitur,  quo  pedem  inferre  nullis  nisi  sacerdotibus  licebat.  Ideo  populum  dicit  Lucas  procul  stetisse,  inter  quem  et  altare  suffitus  longa  erat  distantia,  quoniam  medium  erat  altare,  in  quo  victimae  offerebantur.  Ac  notandum  est  quod  dicit  Lucas,  coram  Deo:  nam  quoties  in  sanctum  ingrediebatur  sacerdos,  quasi  in  Dei  conspectum  prodibat,  ut  inter  eum  et  populum  esset  mediator.  Voluit  enim  Dominus  hoc  populo  suo  testatum  esse,  nemini  mortalium  patere  aditum  in  coelos,  nisi  praeeunte  sacerdote:  imo,  quamdiu  vivunt  homines  in  terris,  non  accedere  ad  thronum  coelestem,  ut  illic  gratiam  inveniant,  nisi  in  mediatoris  persona.  Itaque  quum  multi  essent  sacerdotes,  non  duobus  simul  fas  erat  solenne  intercessionis  officium  pro  populo  obire:  sed  ideo  distributi  erant  in  classes,  ut  unus  duntaxat  sanctuarium  intraret,  atque  ita  non  nisi  unus  eodem  tempore  esset  sacerdos.  Porro  huc  spectabat  thymiama,  ut  admonerentur  fideles,  precationum  suarum  odorem  non  adscendere  in  coelum  nisi  per  sacrificium  mediatoris.  Quomodo  autem  figurae  istae  nobis  conveniant,  ex  epistola  ad  Hebraeos  petendum  est.  12.  Zacharias  turbatus  est.  Tametsi  non  ideo  servis  suis  apparet  Deus,  ut  eos  terreat,  utile  tamen,  imo  necessarium  est,  eos  metu  percelli,  ut  in  se  confusi  iustum  Deo  honorem  praestare  discant.  Nec  solum  narrat  Lucas,  territum  fuisse  Zachariam,  sed  addit,  timorem  irruisse  super  eum:  quo  significat  adeo  expavefactum  esse,  ut  terrori  succumberet.  Neque  hominibus  a  Dei  praesentia  metus  tantum  incutitur,  qui  eos  ad  reverentiam  erudiat,  sed  qui  humiliet  carnis  superbiam,  quae  tam  proterva  est,  ut  nunquam  se  nisi  violenter  subacti  Deo  subiiciant.  Unde  etiam  colligimus,  non  nisi  absente  Deo  (hoc  est,  quum  se  ab  eius  conspectu  subducunt)  superbire  ac  sibi  blandiri.  Nam  si  Deum  ante  oculos  iudicem  haberent,  necesse  esset  protinus  concidere.  Ac  si  hoc  Zachariae,  cui  iustitiae  laus  datur,  ad  conspectum  angeli  accidit,  qui  divinae  lucis  scintilla  est,  quid  fiet  nobis  miseris,  si  nos  Dei  maiestas  ad  fulgorem  suum  producat?  Iam  vero  sanctorum  patrum  exemplo  docemur,  non  alios  vivo  divinae  praesentiae  sensu  affici,  nisi  qui  tremunt  et  trepidant  ad  eius  conspectum,  stupidos  autem  et  hebetes  esse,  qui  eum  loquentem  secure  audiunt.  13.  Ne  timeas.  Zacharia.  Notandum  est,  Dei  gloriam  ita  formidabilem  esse  sanctis,  ut  non  prorsus  absorbeantur  a  pavore,  sed  tantum  ut  inani  fiducia  deiecti  humiliter  eum  suspiciant.  Simul  ergo  ac  carnis  superbiam  prostravit  Deus  in  suis  fideli-