43:12  reputet  sibi  portandum  esse  onus  suum  coram  Deo.  Non  ero  igitur  propitius  super  tribus  et  quatuor  sceleribus:  quia,  inquit,  transtulerunt  captivitatem  perfectam.  Hic  unum  praecipue  scelus  commemorat  propheta,  quod  Gazitae  rapuerunt  Iudaeos  et  Israelitas,  ut  transferrent  eos  captivos  in  Idumaeam,  atque  illic  includerent.  Iam  dixi  non  fuisse  propositum  prophetae  nostro,  recensere  omnia  scelera:  sed  contentus  fuit  scelus  unum  ponere  ut  intelligerent  Israelitae  se  graviori  culpa  constringi,  quod  et  Deum  et  homines  graviter  violaverant.  Si  ergo  tam  severa  ultio  sumenda  erat  de  Gazitis,  debebant  agnoscere  sibi  instare  graviorem  vindictam,  quo  scilicet  et  pluribus  et  maioribus  etiam  peccatis  erant  obstricti:  dicit  autem  transtulisse  captivitatem  perfectam,  quia  neque  mulieribus,  neque  parvulis,  neque  senibus  pepercerant.  Captivitas  enim  perfecta  vocatur  ubi  nullum  habetur  discrimen,  sed  rapiuntur  omnes  promiscue,  et  sine  delectu.  Transtulerunt  igitur  captivitatem  perfectam,  ita  ut  nulla  eos  miseratio  vel  sexus,  vel  aetatis  tangeret,  ut  eam  includerent,  inquit,  in  Edom.  Iam  sequitur  denuntiatio  poenae,  quod  Deus  ignem  emittet  in  murum  Gazae,  qui  devorabit  palatia  eius.  Hinc  autem  apparet  Gazam  fuisse  urbem  splendidam,  et  sumptuose  aedificatam,  quia  de  palatiis  eius  non  abs  re  propheta  loquitur.  Sed  simul  ostendit  neque  munitionem,  neque  opes  fore  impedimento  quo  minus  Deus  poenam  exigat  quam  meriti  sunt  ipsi  Gazitae.  Nominat  etiam  alias  urbes  Palaestinae,  nempe  Ascalon,  et  Azdod,  vel  Azotum,  et  Ecron.  Has  urbes  tenebant  tunc  Philistini.  Significat  igitur  propheta,  quocunque  fugiant,  tamen  nullum  fore  illis  tutum  locum,  quia  Dominus  exponet  in  praedam  hostibus  non  Gazam  duntaxat,  sed  alias  etiam  omnes  urbes.  Et  colligere  licet  Ascalon  fuisse  urbem  primariam,  quia  hic  nominatur  regia  sedes.  Quanquam  enim  Gaza  fuit  caput  totius  gentis,  potest  tamen  fieri  ut  loci  amoenitas,  et  aliae  commoditates  pellexerint  regem,  ut  illic  habitaret,  quanquam  non  erat  metropolis.  Tenentem  igitur  sceptrum  ego  excidam  ex  Ascalon.  Tandem  concludit  perituras  esse  omnes  reliquias  Palaestinae.  Iam  quoties  denuntiat  Deus  interitum  Iudaeis,  tamen  facit  spem  aliquam,  et  dicit  salvas  fore  reliquias  :  hic  autem  propheta  asserit  periturum  quidquid  superfuerit  ex  gente  illa,  quia  Deus  vult  omnes  simul  perdere,  et  totum  nomen.  Ideo  addit,  Iehovam  Dominum  loqui,  Adonai  Iehova  inquit:  et  confirmationis  causa  hoc  fuit  additum,  quoniam  tunc  multis  praesidiis  et  validis  instructi  erant  Philistini  ut  secure  deriderent  prophetae  minas.  Proponit  ergo  hic  Dei  nomen.  Nunc  sequitur  vaticinium  contra  Tyrum.  9.  Sic  dicit  Iehova,  Super  tribus  sceleribus  Tyri  et  super  quatuor  non  ero  ei  propitius,  quia  concluserunt