39:12  tenemus  quomodo  inter  se  conveniant  cognitio  prophetica,  qua  praeditus  fuit  Ieremias,  et  ignorantia  quae  eum  impulit  ad  istam  exclamationem.  Sciebat  certissimum  esse  quod  in  visione  ostensum  fuerat,  sed  quid  hoc  sibi  vellet,  et  quomodo  peragendum  esset  hoc  Dei  opus,  id  vero  incomprehensibile  fuit:  et  hinc  admiratio.  Dicit  igitur  se  precatum  fuisse:  quo  docemur  quoties  nobis  obrepunt  cogitationes,  quae  nos  huc  et  illuc  agitent,  confugiendum  esse  ad  preces.  Multi  enim  suas  anxietates  fomentis  obdurant,  dum  scilicet  sese  torquent  in  omnes  partes,  et  exercent  omnes  suos  sensus  ac  fatigant  sine  ullo  fructu.  Quoties  igitur  aliqua  anxietas  nobis  obrepit,  sciamus  hoc  remedium  mature  esse  adhibendum,  nempe  ut  Deum  precemur,  quo  nos  expediat,  nec  sinat  in  profundum  demergi,  quemadmodum  accidere  solet  omnibus  curiosis,  et  qui  habenas  sibi  laxant  in  suis  imaginationibus.  Iam  videmus  prophetam  sic  fuisse  quasi  obstupefactum  ut  tamen  non  sibi  plus  promiserit,  quam  utile  erat,  sed  statim  concesserit  ad  preces,  ut  Deus  ostenderet  quod  ipsum  angebat.  Sequitur  precatio,  quae  tamen  non  statim  explicat  mentem  prophetae.  Neque  enim  usque  ad  versum  25,  declarat  quorsum  precatus  fuerit.  Sed  videtur  hic  congerere  multa  extra  rem.  Tenendum  est  eius  consilium  ex  summa  precationis:  Domine,  inquit,  quorsum  iussisti  ut  agrum  emerem,  qui  tamen  est  sub  manu  hostium?  agrum  possident  Chaldaei:  tu  vero  iubes  me  pecuniam  profundere.  Haec  fuit  summa  postulationis.  Sed  videtur  Ieremias  vagari  per  longos  circuitus  quum  dicit,  Tu  fecisti  coelum  et  terram  in  potentia  tua,  et  brachio  extento:  nihil  est  tibi  admirabile:  tu  facis  misericordiam  in  mille  generationes:  rependis  iniquitatem  patrum  in  filios:  nomen  tuum  est  Iehovah  exercituum:  tu  es  magnus  consilio  et  excellens  opere:  oculi  tui  sunt  aperti,  et  quae  sequuntur  videntur  haec  nihil  ad  praesentem  causam  facere.  Sed  minime  dubium  est  quin  propheta  se  ipsum  quasi  iniecto  fraeno  cohibere  voluerit,  ut  acquiesceret  Dei  consilio,  quamvis  esset  absconditum  et  incomprehensibile.  Nam  si  erupuisset  statim  in  suam  precationem,  poterat  primo  impetu  fervoris  cum  Deo  litigare.  Ita  enim  fert  hominis  ingenium,  ut  subito  Deum  compellat,  ut  ebulliat  extra  modum.  Propheta  igitur  qui  satis  tenebat  non  esse  tantam  moderationem  in  hominibus,  ut  recte  iudicent  de  operibus  Dei  et  sobrie,  opposuit  sibi  haec  claustra,  et  quasi  circumdedit  sibi  cancellos,  ut  ne  sibi  plus  licentiae  concederet,  quam  fas  erat.  Sciamus  ergo  haec  omnia  elogia,  quibus  propheta  Deum  insignit,  spectare  in  hunc  finem,  ut  sibi  ipsi  moderationem  et  modestiam  imperet,  atque  ita  compescat  omnes  vagos  sensus,  quibus  titillari  solent  nomines.  Nunc  veniamus  ad  verba  ipsa:  Aha  Adonai  Iehovah,  inquit,  Heu  Domine  Deus,