37:12  absurdum  non  est  virtute  spiritus  omnia  reparari:  atque  rursus  eadem  in  nihilum  redigi  quae  prius  aliquid  esse  videbantur.  Nihil  enim  sumus  nisi  in  Deo.  In  eo  autem  ut  incipiamus  aliquid  esse,  ante  convinci  oportet  nostrae  vanitatis,  ut  eius  probe  conscii  simus.  Propterea  Dominus  efflat  in  nos,  ut  nos  ex  nobis  ipsis  nihil  esse  intelligamus.  Iam  vero  ut  scirent  omnes  prophetam  non  loqui  de  alienigenis,  sed  de  populo  ipso  qui  Dei  nomine  gloriabatur,  subiunxit  populum  foenum  esse.  Existimassent  enim  Iudaei  se  antecellere  et  dignitate  aliis  praestare,  ideoque  a  communi  aliorum  sorte  eximendos:  eos  igitur  proprie  ac  nominatim  compellat,  ne  quid  sibi  prae  aliis  arrogent.  Quasi  diceret  prudenter  eos  facere,  si  inopiam  suam  reputando  omnem  sui  fiduciam  abiiciant.  In  summa,  quum  propheta  consolationis  mentionem  fecisset,  ostendit  quomodo  sint  homines  ad  eam  praeparandi:  nec  enim  eius  capaces  esse,  nisi  prius  in  nihilum  redigantur.  Emolliri  ergo  duritiem  nostram,  deiici  altitudinem  et  prosterni,  pudefieri  iactantiam,  domari  animos  nostros  atque  humiliari  necesse  est,  si  cum  aliquo  fructu  consolationes  percipere  velimus,  quae  nobis  a  prophetis  Dei  iussu  afferuntur.  8.  (Arescet  herba.)  Repetitio  haec  iterum  ad  exinaniendam  carnis  gloriam  subiicitur:  simul  tamen  consolationem  optimam  in  se  continet,  Deum  scilicet  ubi  suos  deiecit  statim  ipsos  erigere  ac  reficere.  Talis  igitur  est  contextus:  Foenum  quidem  marcescit  atque  interit,  sed  verbum  Domini  in  aeternum  manet.  Haec  sola  consolatio  nobis  reliqua  est,  postquam  intelleximus  quam  inanes  et  vacui  simus  bonorum  omnium,  quam  fluxa  et  caduca  sit  carnis  nostrae  gloria,  ut  verbo  Domini,  quasi  porrecta  manu,  erigamur.  Fragiles  nos  esse  et  caducos,  sed  stabilem  atque  aeternum  esse  sermonem  Domini:  denique  vitam,  quae  in  nobis  deficit,  aliunde  offerri.  Hic  tota  evangelii  summa  comprehenditur  paucis:  constat  enim  agnitione  nostrae  miseriae,  inopiae  ac  vanitatis,  ut  vere  humiliati  confugiamus  ad  Deum,  a  quo  solo  in  integrum  restitui  nos  oportet.  Ne  ergo  exanimentur  homines  aut  frangantur,  qui  nuditatem  suam  et  vanitatem  norint,  quia  aeternum  Dei  verbum  iis  proponitur,  quo  abunde  fulciri  ac  sustentari  possunt.  Docemur  praeterea  non  aliunde  petendam  esse  consolationem,  quam  ab  aeternitate,  quae  non  alibi  quam  in  Deo  quaerenda  est,  quando  nihil  reperietur  in  terra  firmum  aut  stabile.  Nihil  enim  magis  insipidum  quam  acquiescere  in  statu  praesenti,  quem  evanidum  cernimus.  Fallitur  autem  quisquis  solidam  felicitatem  se  adipisci  posse  sperat,  donec  ad  Deum  conscenderit:  quem  ideo  scriptura  aeternum  vocat,  ut  sciamus  vitam  ab  eo  nobis  fluere:  sicuti  hac  lege  nos  sibi  filios  adoptat,  ut  faciat  suae  immortalitatis  consortes.  Sed  parum  id  prodesset,  nisi  ratio  eius  quaerendi  nobis  ostende-