35:12  nous  ne  devons  point  condamner  tout  courroux:  quand  nous  voyons  qu'un  homme  s'eschauffe  et  se  colere,  il  ne  faut  point  que  nous  attribuons  tousiours  cela  a  vice:  comme  nous  voyons  des  mocqueurs  de  Dieu  qui  diront,  O  se  faut-il  ainsi  tempester?  Se  faut-il  courroucer?  Ne  sauroit-on  user  d'une  facon  paisible?  Ils  blasphemeront  Dieu  meschamment,  ils  le  despiteront:  comme  on  en  voit  beaucoup  qui  voudroyent  renverser  toute  bonne  doctrine,  ne  demandans  sinon  de  mettre  telles  corruptions  par  tout,  qu'on  ne  cognust  plus  que  c'est  de  Dieu,  et  que  sa  verite  fust  ensevelie.  Or  ayans  fait  cela,  ils  voudroyent  qu'on  dissimulast,  ou  bien  qu'on  approuvast  tout  ce  qu'ils  font,  et  qu'en  chaire  on  ne  fist  que  conter  des  fables,  qu'il  n'y  eust  nulles  reprehensions.  C'est  bien  a  propos,  (diront  ils)  ne  sauroit-on  prescher  sans  se  courroucer?  Et  comment?  Est-il  possible  que  nous  voyons  qu'une  creature  mortelle  et  caduque  s'esleve  ainsi  contre  la  maieste  de  Dieu,  pour  fouler  au  pie  toute  bonne  doctrine:  et  cependant  que  nous  portions  cela  patiemment?  Nous  monstrerions  bien  par  cela  que  nous  n'avons  nul  zele  de  Dieu:  car  il  est  dit  au  Pseaume  (69,  10),  Que  le  zele  de  la  maison  de  Dieu  nous  doit  manger.  Car  si  nous  avions  un  ver  qui  nous  rongeast  le  coeur,  nous  ne  devrions  point  estre  tant  esmeus,  que  quand  il  y  a  quelque  opprobre  qui  est  fait  a  Dieu,  que  nous  voyons  que  sa  verite  est  convertie  en  mensonge.  Ainsi  donc  apprenons  de  ne  point  ainsi  dissimuler  aux  vices:  mais  discernons  entre  le  zele  de  Dieu,  et  entre  le  courroux  charnel  dont  les  hommes  sont  esmeus  et  enflammez  pour  leurs  querelles  propres:  comme  ici  il  est  dit,  qu'Eliu  a  este  enflamme  d'indignation,  qu'il  s'est  courrouce  ardemment,  et  cela  toutes  fois  luy  est  repute  a  vertu:  car  c'est  le  sainct  Esprit  qui  parle.  Cognoissons,  di-ie,  par  cela  qu'il  ne  nous  faut  point  du  premier  coup  reietter  tout  courroux,  mais  que  nous  devons  discerner  la  cause  pourquoy  un  homme  sera  enflamme:  car  quand  il  luy  fait  mal  qu'on  offense  Dieu,  et  que  la  verite  est  renversee,  considerons  que  cela  procede  d'une  bonne  fontaine.  Et  au  reste  apprenons  (suivant  ce  que  i'ay  desia  dit)  de  desployer  nostre  colere,  quand  nous  voyons  que  l'honneur  de  Dieu  est  blesse,  et  qu'on  tasche  d'obscurcir  sa  verite,  ou  de  la  desguiser,  que  nous  soyons  esmeus  de  cela,  que  nous  soyons  enflammez,  pour  monstrer  que  nous  sommes  enfans  de  Dieu:  car  nous  n'en  pouvons  pas  donner  meilleure  approbation.  Et  cependant  toutes  fois,  que  nous  tenions  mesure,  tellement  que  nous  ne  meslions  point  nos  passions  excessives  parmi  le  zele  de  Dieu,  que  nous  ayons  ceste  prudence  de  discerner:  et  apres,  combien  que  nous  hayssions  les  vices  et  les  detestions,  que  toutes  fois  nous  taschions  d'amener  les  personnes  a  salut.  Or  il  est  vray  que