30:12  quandoquidem  auxilium  nostrum  in  Deo  situm  est,  in  quo  solo,  nostram  infirmitatem  fatentes,  conquiescimus.  Quare  licet  infirmi,  nunquam  tamen  adversis  ullis  rebus  deiiciemur,  quin  Deus  ipse  labantes  sustineat:  quemadmodum  in  priore  sua  canonica  Ioannes  nos  docet.  Transeamus  deinceps  ad  sequentia,  in  quibus  Saul  dicitur  constitisse  in  Galgal,  et  ibi  Samuelem  per  septem  dies  exspectavisse.  Quod  de  Gabaa  Saulis,  hic  commemoratur,  fuit  e  regione  Bethaven:  qui  tamen  locus  non  ita  prius  nominabatur,  sed  potius  Bethel  (quod  obiter  dictum  esto)  et  nomen  impositum  erat  a  Iacobo,  quemadmodum  satis  nota  est  historia:  sed  hic  ratione  eorum  quae  deinceps  contigerunt  spiritus  Dei  loquitur  de  Bethaven.  Nam  quod  ibi  populus  ad  idololatriam  conversus  est,  licet  ad  Iacobi  exemplum  et  imitationem  Dei  cultum  simularent,  quem  potius  ludibrio  habebant,  prophetae  locum  illum,  quem  antea  Iacobus  Bethelem  nominaverat,  idest  domum  Dei,  propter  insignem  illam  visionem  quam  eo  loco  habuerat,  ut  scriptum  est  Genes.  23  cap.  Bethaven  dixerunt,  ut  ita  docerent  Iacobi  posteros  pessime  in  exemplum  traxisse  Iacobi  factum,  eo  loco  altare  in  quo  visionem  habuerat  erigentis.  Nam  mandatis  Dei  parere  illos  oportebat,  qui  prohibuerat  illos  deinceps  sibi  ullum  altare  ex  suo  arbitrio  et  voluntate  construere;  quandoquidem  Dei  erat  legis  ipsis  imponere,  et  sibi  debitum  honorem  poscere.  Deus  vero  templum  in  monte  Sion  aedificari  iusserat;  populus  autem  in  Bethel  sacrificabat:  et  idcirco  prophetae  dicunt,  Domum  illam  Bethel  in  posterum  Bethaven,  id  est  domum  iniquitatis  vocatum  iri.  Caeterum  quod  Sauli  tempus  a  Samuele  praescriptum  dicitur,  secundum  quod  exspectari  a  Saule  debuit,  mirum  videri  posset,  et  Saulem  spe  sua  interim  frustrari.  Nam  quare  Samuel,  si  a  Deo  constitutum  erat,  praescripto  tempore  non  adveniebat?  Sane  defectus  hic  apparet  maximus,  et  quidem  soli  Samueli  videtur  imputandus.  Et  quidem  aliquis  dicat  etiam  prophetae  nomine  abusum  ad  Saulem  decipiendum,  ac  proinde  Dei  nomen  blasphemis  hominum  vocibus  exposuisse  lacerandum.  Nam  quum  Deus  aliquid  per  prophetas  edicit,  oportet  illud  impleri  re  ipsa,  ut  non  frustra  Deus  loquutus  videatur,  et  nullus  hominum  mentibus  scrupulus  iniiciatur.  Verumenimvero  memoria  repetendum  nobis  est,  quod  saepe  in  sacris  occurrit,  nempe  Deum  saepe  suorum  explorare  patientiam,  quum  non  apparet  ipsis  auxilium  ferens  tam  repente  quam  ipsi  optarent,  aut  sibi  persuaserant:  aut  etiam  quando  videtur  verbo  suo  quodammodo  repugnare.  Exempli  gratia,  apud  Isaiam  prophetam  Deus  dicit  se  cogitasse  de  nobis  subveniendo  antequam  ad  ipsum  vociferemur.  Quae  promissio  ad  nostri  temporis  fideles  pertinet,  vel  ipso  teste