3:12  12  privé:  mais  i'entrepren  la  cause  commune  de  tous  les  fideles,  et  mesme  celle  de  Christ,  laquelle  auiourdhuy  est  en  telle  maniere  du  tout  descirée  et  foulée  en  vostre  royaume,  qu'elle  semble  advis  desesperée.  Ce  qui  est  bien1)  advenu  par  la  tyrannie  d'aucuns  Pharisiens,  plustost  que  de  vostre  vouloir.  Mais  comment  cela  se  fait,  il  n'est  point  mestier  de  le  dire  icy.  Quoy  que  ce  soit,  elle  est  grandement  affligée.  Car  la  puissance  des  adversaires  de  Dieu  a  obtenu  iusques  là,  que  la  verité  de  Christ,  combien  qu'elle  ne  soit  perdue  et  dissipée,  toutesfois  soit  cachée  et  ensevelie  comme  ignominieuse:  et  outre,  que  la  povrette  Eglise  soit  ou  consumée  par  morts  cruelles,  ou  dechassée  par  bannissemens,  ou  tellement  estonnée  par  menaces  et  terreurs,  qu'elle  n'ose  sonner  mot.  Et  encore  ils  insistent  en  telle  rage  qu'ils  ont  accoustumé,  pour  abbatre  la  paroy  qu'ils  ont  ia  esbranlée,  et  parfaire  la  ruine  qu'ils  ont  encommencée.  Cependant  nul  ne  s'avance,  qui  s'oppose  en  defenses  contre  telles  furies.  Et  s'il  y  en  a  aucuns  qui  veulent  estre  veuz  tresfort  favoriser  à  la  verité,  ils  disent  qu'on  doit  aucunement  pardonner  à  l’imprudence  et  ignorance  des  simples  gens.  Car  ils  parlent  en  ceste  maniere,  appellans  la  trescertaine  verité  de  Dieu,  Imprudence  et  ignorance:  et  ceux  que  nostre  Seigneur  a  tant  estimez,  qu'il  leur  a  communiqué  les  secrets  de  sa  sapience  celeste,  Gens  simples:  tellement  tous  ont  honte  de  l'Evangile.  Or,  c'est  vostre  office,  Sire,2)  de  ne  destourner  ne  vos  oreilles  ne  vostre  courage  d'une  si  iuste  defense,  principalement  quand  il  est  question  de  si  grande  chose:  c'est  assavoir  comment  la  gloire  de  Dieu  sera  maintenue  sur  terre:  comment  sa  verité  retiendra  son  honneur  et  dignité:  comment  le  regne  de  Christ  demeurera  en  son  entier.  O  matiere  digne  de  voz  oreilles,  digne  de  vostre  iurisdiction,  digne  de  vostre  Throne  royal!  Car  ceste  pensée3)  fait  un  vray  Roy,  s'il  se  recognoist  estre  vray  ministre  de  Dieu  au  gouvernement  de  son  royaume:  et  au  contraire,  celuy  qui  ne  regne