29:12  est  dit  que  toute  plenitude  habite  en  luy,  voire  en  perfection,  et  en  droite  substance,  qu'il  n'y  a  point  ici  d'ombrages  ne  de  figures.  Puis  qu'ainsi  est  donc  que  Dieu  est  pleinement  revele  a  nous  en  nostre  Seigneur  Iesus  Christ,  et  qu'il  veut  que  la  sa  face  soit  contemplee:  il  est  certain  que  nous  ne  pouvons  nous  vanter  d'avoir  le  vray  Dieu,  si  ce  n'est  que  nostre  Seigneur  Iesus  Christ  regne  au  milieu  de  nous,  et  qu'il  soit  honore,  et  qu'on  se  tienne  pleinement  a  luy,  et  qu'on  s'y  arreste.  Or  les  Iuifs  l'ont  renie,  et  l'ont  desavoue  du  tout:  ainsi  donc  par  cela  ils  ont  provoque  Dieu  a  ialousie,  et  il  ne  leur  est  plus  rien  demeure  que  follie,  et  fausse  imagination,  en  laquelle  ils  se  sont  trompez  et  deceus.  Et  ainsi  ce  n'est  point  sans  cause  que  sainct  Paul  allegue  ce  passage,  disant:  Puis  que  les  Iuifs  ont  provoque  Dieu  a  ialousie,  quand  ils  n'ont  point  voulu  accepter  son  Fils  unique:  qu'alors  il  a  suscite  un  peuple  qui  n'estoit  rien  auparavant.  Or  ici  nous  voyons  encores  mieux  ce  que  desia  i'ay  declare,  c'est  assavoir  que  Dieu  a  use  de  longue  patience  envers  ceux  qui  eussent  este  bien  dignes  qu'il  eust  foudroye  contr'eux  du  premier  coup:  car  entre  la  Loy  et  nostre  Seigneur  Iesus  Christ  il  y  a  eu  environ  deux  mille  ans.  Or  si  nous  contons  les  annees,  tantost  apres  la  mort  de  Iosue  les  Iuifs  ont  commence  de  se  mesler  parmi  les  infections  et  puantises  des  Payens,  que  les  idoles  ont  este  eslevez  entr'eux.  Voila  donc  Dieu  qui  laisse  couler  plus  de  dixhuit  cens  ans,  et  attend  tousiours  s'il  y  aura  quelque  correction,  non  pas  qu'il  dissimule,  car  il  les  chastie  afin  de  les  advertir  de  leurs  fautes.  Or  ils  se  retournent  a  luy  :  mais  tantost  il  y  a  revolte  nouvelle  :  que  quand  ils  ont  cogneu  que  c'estoit  par  leurs  pechez  que  ce  mal  leur  estoit  advenu,  et  qu'ils  donnoyent  quelque  signe  de  repentance,  du  iour  au  lendemain  ils  retournent  a  nouvelle  cheute:  et  Dieu  encores  recommence  a  les  punir.  En  la  fin  ceste  captivite  de  Babylone  advient,  si  horrible  et  malheureuse  comme  elle  est  descrite,  qu'ils  sont  bannis  de  la  terre  qu'il  leur  avoit  promise  en  heritage,  ils  sont  dechassez  de  leurs  maisons.  Et  en  la  fin  Dieu  encores  en  a-il  pitie,  et  les  rameine.  Or  sont-ils  venus  au  pais  de  leur  naissance?  sont-ils  restituez  en  liberte?  Derechef  ils  sont  pires  que  devant.  Il  faut  donc  que  Dieu  aussi  les  punisse,  iusques  a  tant  que  les  voila  a  l'extremite,  et  au  comble.  Or  alors  nostre  Seigneur  Iesus  Christ  vient  pour  remedier  a  toutes  leurs  maladies:  et  mesmes  ce  n'est  point  sans  cause  qu'il  est  nomme  la  resurrection  des  morts.  Car  combien  que  les  Iuifs  fussent  lors  tous  dissipez,  si  est-ce  que  Dieu  les  a  recueillis  a  soy  par  la  main  de  son  Fils,  quand  ils  eussent  cogneu  le  iour  de  leur  visitation.  Or  ils  monstrent  bien  qu'ils  sont  obstinez  a  l'encontre  de  Dieu,  qu'il  n'y