28:12  Paul  nous  le  monstre,  en  disant:  Supportez  les  fardeaux  les  uns  des  autres.  C'est  comme  s'il  disoit,  que  nos  infirmitez  sont  des  charges,  et  que  nous  avons  besoin  d'estre  soulagez.  Il  faut  donc  exercer  nostre  charite  en  cest  endroict.  Ie  verray  mon  prochain  qui  est  infirme:  i'enten  cela  de  tous,  car  les  plus  parfaits  encores  ont-ils  tousiours  quelques  fautes  en  eux:  ils  ont  besoin  d'estre  supportez.  Et  de  ma  part,  ie  ne  pourray  point  aussi  estre  endure,  sinon  qu'on  ait  pitie  de  moy:  i'auray  mes  charges  aussi  bien  qu'un  chacun.  Pour  ceste  cause  Dieu  nous  remonstre:  Portez  les  charges  les  uns  des  autres:  car  c'est  la  Loy  de  Christ  (dit  sainct  Paul).  Or  ceste  loy  a  este  bien  aussi  de  tout  temps.  Car  s'il  a  fallu  soulager  les  bestes  brutes  sous  la  Loy  de  Moyse,  il  falloit  bien  aussi  soulager  les  hommes,  comme  desia  nous  avons  dit.  Mais  S.  Paul  nous  monstre,  qu'auiourd'huy  plus  que  iamais  il  nous  faut  employer  a  cela.  Car  nostre  Seigneur  Iesus  Christ  nous  declaire  que  c'est  le  principal  sacrifice  qu'il  demande,  voire  pour  Dieu  son  Pere:  c'est  assavoir  qu'un  chacun  regarde  en  quoy  il  pourra  aider  ses  prochains:  et  que  s'il  y  voit  des  infirmitez,  qu'il  tasche  d'y  remedier.  Il  est  vray  qu'il  ne  nous  faut  point  nourrir  les  vices.  Et  sainct  Paul  aussi  ne  nous  exhorte  point  a  cela,  quand  il  dit:  Portez  les  charges  les  uns  des  autres.  Ce  n'est  pas  qu'on  dissimule,  et  qu'on  face  du  borgne  quand  quelcun  aura  failli,  et  qu'on  le  nourrisse  ainsi  en  son  mal:  car  ce  seroit  plustost  laisser  les  povres  creatures  errantes,  iusques  a  ce  qu'elles  fussent  du  tout  tombees  en  la  fosse  de  perdition.  Ce  n'est  point  donc  ainsi  que  sainct  Paul  nous  commande  de  porter  les  fardeaux  de  nos  prochains  :  mais  c'est  quand  nous  verrons  quelcun  qui  sera  fasche,  que  nous  le  consolions:  quand  nous  verrons  un  autre  qui  sera  infirme,  que  nous  luy  donnions  courage:  quand  nous  verrons  quelcun  qui  sera  trop  enveloppe  aux  solicitudes  de  ce  monde,  que  nous  taschions  de  l'en  retirer,  et  que  nous  l'exhortions  d'avoir  sa  fiance  en  Dieu  mieux  qu'il  n'a,  et  qu'il  ne  soit  point  tant  attache  aux  choses  de  ce  monde.  Quand  donc  nous  tascherons  ainsi  de  remedier  a,  tous  vices,  nous  porterons  les  fardeaux  et  les  charges  les  uns  des  autres.  Et  afin  de  nous  induire  a  cela,  cognoissons  qu'il  n'y  a  nul  qui  n'ait  besoin  d'estre  supporte.  Voila  donc  ce  que  nous  avons  a  recueillir  de  ce  passage,  quand  il  est  dit  que  nous  sommes  tenus  de  redresser  un  boeuf,  ou  un  asne,  ou  quelque  autre  beste,  quand  elle  sera  tombee  par  les  champs,  et  que  nous  la  devons  secourir  entant  qu'en  nous  sera.  Or  il  n'est  ici  parle  que  de  Frere.  Il  est  dit:  Si  l'asne  de  ton  frere  est  perdu,  ou  quelque  autre  chose:  si  le  boeuf,  ou  un  cheval  de  ton  frere  est  tombe  par  les  chemins,  que  tu  le  releves.  Qui  sont  les  freres