19:119  119  EPISTOLAE  3615-3618  120  parabilis  ille  thesaurus  quem  Deus  apud  te  deposuerat,  utinam  potius  sis  ipse  iudex,  quam  exspectes  dum  coram  coelesti  iudice  reddenda  sit  otii  ratio.  Quid  dico  otium?  Neque  enim  sine  fructu  solum  iacuerunt  tot  praeclarae  dotes,  sed  in  sordibus  demersae  in  probrum  et  dedecus  sincerae  fidei  quodammodo  cessarunt.  Quamvis  enim  laude  digna  fuerit  vitae  integritas  et  castitas:  scis  tamen,  et  non  sine  maximo  dolore  viderunt  pii  et  cordati  homines,  impios  et  sceleratos  de  te  triumphum  agere,  quum  metu  constrictus  obmutesceres.  Praeteriit  nimis  longum  tempus,  quo  misera  illa  non  minus  quam  turpis  servitus  mentis  tuae  vigorem  oppressit.  Detur  venia  communi  malo:  quia  obiectis  undique  terroribus  pauci  ingenue  Christi  se  discipulos  profiteri  audebant.  Nunc  vero  ex  quo  melior  affulsit  conditio  filiis  Dei,  ut  a  periculo  immunis  sit  eorum  libertas,  erumpere  in  vocem  cogor:  Quousque  tandem  sponte  libebit  tergiversando  Christum  iure  suo  fraudare?  Hactenus  indulgenter  tibi  Deus  pepercit,  dum  rectae  intelligentiae  lumen,  quod  cunctatione  tua  suffocasti,  prorsus  exstingui  passus  non  est.  Sed  obsecro  per  hanc  indulgentiam,  qua  te  ad  hunc  usque  diem  sustinuit,  quo  tot  hominum  millia  sub  vexillum  se  colligendo  te  ad  eandem  studii  alacritatem  invitant,  ut  diligenter  tecum  reputes  quam  pretiosum  Deo  sacrificium  sit  pura  Dei  confessio:  ut  quod  residuum  est  vitae,  ubi  simpliciter  Christo  dicatum  fuerit,  tarditatem  anteacti  temporis  compenset.  Nihil  certe  iucundius  mihi  accidere  poterit,  quam  si  audiero,  te  excussa  mollitie  et  timiditate  victa  Christo  palam  et  ex  professo  nomen  dedisse.  Quanquam  ut  hoc  mihi  privatim  des  non  postulo,  sed  ut  ecclesias  omnes  quas  mirabiliter  Deus  in  Gallia  erexit  exhilares:  quae  certatim  sibi  et  tibi  gratulabuntur,  si  relictis  hostium  castris  te  in  Christi  ovile  contuleris.  Nec  parvus  eorum  qui  adhuc  vacillant  numerus  se  ad  imitationem  protinus  accinget.  Ac  si  prudenter  expendas  quam  multi  abs  te  pendeant,  et  quam  multorum  in  te  conversi  sint  oculi,  facile  cognosces,  ut  excusabilis  sit  aliorum  torpor,  cessationi  tuae  nullo  modo  posse  ignosci.  Forte  iam  satis  te  animatum  reperient  meae  literae,  ut  supervacua  sit  exhortatio.  Partibus  tamen  meis  deesse  nolui.  Vale,  praestantissime  vir  et  mihi  ex  animo  colende.  Dominus  te  spiritu  suo  gubernet,  fortitudine  instruat  et  incolumem  tueatur.  13.  Calendas  Decembris,  1561.  Ioannes  Calvinus  tuus.