58:118  avoit  grande  famille:  comme  nous  avons  veu,  voila  mesme  Abraham  qui  tire  de  sa  maison  plus  de  quatre  cens  hommes  equipez  pour  entrer  en  combat,  Isaac  n'avoit  pas  este  diminue,  comme  nous  voions:  ainsi,  il  ne  se  faut  point  esbahir,  si  habitant  en  pais  estrange,  il  a  loe  ou  prins  a  ferme  quelque  terre  pour  y  semer:  selon  que  nous  savons  que  les  Peres  anciens,  encore  que  Dieu  les  eust  enrichis,  n'ont  pas  laisse  de  s'adonner  au  travail,  et  eux  et  leur  famille.  Car  encore  qu'ils  eussent  et  richesses  et  commoditez,  si  est-ce  qu'ils  n'ont  pas  abuse  des  biens  que  Dieu  leur  avoit  eslargis,  en  pompes,  ni  en  oisivete,  pour  faire  des  Rois:  mais  c'estoit  pour  se  tenir  tousiours  en  petit  estat.  Voila  donc  en  somme  ce  que  nous  avons  a  retenir,  quand  Isaac  ayant  afferme  quelque  possession,  y  a  seme.  Et  ceci  est  recite  de  Moise,  pource  qu'il  aiouste,  Que  Dieu  l'a  beni,  et  l'a  fait  tellement  prosperer,  qu'il  a  recueilli  cent  fois  autant.  Or  nous  le  trouverons  estrange  en  ce  pais,  qui  est  bien  maigre  et  quasi  sterile,  en  comparaison  de  Iudee  et  de  Syrie,  et  de  ces  pais-la:  mesme  quand  on  nous  parleroit  de  cinquante,  encore  la  chose  nous  sembleroit  quasi  incroyable:  pource  que  nous  estimons  ce  qui  nous  est  dit,  selon  ce  que  nous  avons  veu.  Or  ce  n'est  point  sans  cause  que  nostre  Seigneur  Iesus  Christ  nous  declare  cela  par  la  similitude  qu'il  amene  du  grain  qu'on  seme  :  combien  qu'il  parle  a  autre  propos:  mais  toutefois  il  dit,  que  quand  on  semera,  une  partie  tombe  au  chemin,  et  les  oiseaux  la  mangent:  il  en  tombera  sur  les  pierres,  et  cela  ne  tirera  point  de  racine:  car  il  n'y  a  point  de  substance:  l'autre  partie  sera  estouffee  sous  les  buissons  et  les  espines:  mais  ce  qui  tombe  en  bonne  terre,  dit-il,  apporte  fruit  l'un  de  trente,  l'autre  de  soixante,  et  puis  de  cent.  Quand  nous  venons  iusques  la,  comme  i'ay  dit,  nous  n'en  pourrions  pas  estre  persuadez,  sinon  que  le  Fils  de  Dieu  parlast.  Mais  les  anciens  qui  ont  escrit  mesme  de  la  terre  de  Chaldee,  et  qui  avoiens  mesme  este  sur  le  lieu,  et  qui  avoient  cognu  tout  disent  que  l'ordinaire  estoit  de  quatre  vingts  et  de  cent.  Or  ici,  pour-ce  qu'il  est  parle  du  pais  des  Philisthins,  qui  estoit  gras,  mais  non  pas  comme  Chaldee,  Moise  recite  pour  un  don  singulier  que  Dieu  a  fait  a  Isaac,  qu'il  recuillit  cent  fois  autant.  Voila  donc  un  signe  de  la  benediction  de  Dieu  sur  Isaac,  mesme  quant  a  ce  qui  appartient  a  ceste  vie  transitoire.  Car  combien  que  les  peres  anciens  aient  tousiours  regarde  a  l'heritage  celeste,  et  qu'ils  y  aient  adonne  toutes  leurs  affections:  si  est-ce  toutefois,  qu'estans  hommes  mortelz,  ils  avoient  besoin  que  Dieu  leur  donnast  quelque  goust  de  sa  bonte  en  ce  monde.  Car  ce  que  dit  saint  Paul  a  tousiours  eu  lieu,  Que  la  crainte  de  Dieu  a  les  promesses  non  seulement  de  la  vie  eternelle,  mais  aussi  de  la  vie  presente.  Nous  ne  serons  pas  auiourd'hui  rassasiez  des  biens