50:118  verbi  ministris  idemque  officium,  sunt  tamen  honoris  gradus.  Deus  autem  Paulum  in  altiore  fastigio  quam  alios  collocaverat,  quum  eius  opera  usus  fuerat  ad  fundandam  illam  ecclesiam,  et  eius  apostolatum  ornaverat  multis  modis.  Porro  ne  invidiam  sibi  conflarent  malevoli  ex  nomine  potestatis:  addit  in  quem  finem  sibi  data  sit:  nempe  in  salutem  Corinthiorum.  Unde  sequitur,  non  debere  illis  molestam  esse  nec  gravem.  Quis  enim  aequo  animo  non  ferat,  imo  quis  non  amet  quod  sibi  utile  esse  cognoscit?  Interea  subest  antithesis  eius  potestatis,  qua  se  efferebant  pseudoapostoli:  quae  talis  erat  ut  nullum  inde  fructum  perciperent,  nullam  aedificationem  sentirent  Corinthii.  Caeterum  non  dubium  est  quin  potestate  etiam  praediti  sint  omnes  verbi  ministri.  Qualis  enim  doctrinae  praedicatio  absque  potestate?  ideo  omnibus  dictum  est:  Qui  vos  audit,  me  audit:  qui  vos  respuit,  me  respuit.  Sed  quoniam  multi  falso  sibi  usurpant  quod  non  habent,  diligenter  notandum  est  quousque  suam  potestatem  extendat  Paulus:  nempe  ut  sit  in  aedificationem  fidelibus.  Qui  ergo  destruendo  ecclesiam  potestatem  exercent,  tyrannos  se  et  latrones  probant,  non  pastores.  Secundo  notandum  quod  sibi  datam  a  Deo  esse  asserit.  Qui  igitur  aliquid  vult  posse,  Deum  suae  potestatis  autorem  habeat  oportet.  Iactabunt  etiam  hoc  alii:  quemadmodum  papa  inflatis  buccis  se  Christi  vicarium  esse  detonat.  Sed  quam  fidem  facit?  Neque  enim  mutis  personis  eiusmodi  potestatem  contulit  Christus:  sed  apostolis  et  aliis  suis  ministris,  ne  evangelii  sui  doctrina  exarmata  foret.  Quare  tota  ministrorum  potestas  in  verbo  est  inclusa,  ut  semper  nihilominus  maneat  Christus  solus  dominus  et  magister.  Meminerimus  ergo  in  legitima  potestate  haec  duo  requiri:  ut  a  Deo  data  sit,  ut  in  salutem  ecclesiae  exerceatur.  Quibus  potestatem  contulerit  Deus,  et  qualiter  eam,  quam  dedit,  limitaverit,  notum  est.  Rite  eam  exercent  qui  mandato  eius  fideliter  obediunt.  Hic  tamen  potest  obiici  quaestio:  verba  Dei  sunt  ad  Ieremiam  (1,  10):  Ecce  constituo  te  supra  gentes  et  regna,  ut  plantes  ac  evellas,  aedifices  ac  destruas.  Et  nuper  habuimus,  eadem  conditione  ordinatos  apostolos,  ut  demoliantur  quidquid  effertur  adversus  Christum:  quinetiam  aliter  aedificare  nequeunt  evangelii  doctores,  nisi  veterem  hominem  destruendo.  Praeterea  in  condemnationem  et  exitium  impiis  evangelium  annuntiant.  Respondeo,  quod  hic  dicit  Paulus,  ad  impios  nihil  pertinere.  Corinthios  enim  alloquitur,  quibus  salutarem  esse  volebat  suum  apostolatum.  Eorum,  inquam,  respectu  nihil  nisi  in  aedificationem  poterat.  Et  iam  diximus  hoc  nominatim  fuisse  expressum,  ut  scirent  Corinthii,  nonnisi  a  Satana  salutis  suae  hoste  impugnari  sancti  viri  autoritatem  :  cuius  finis  erat  ipsorum  aedificatio.  Quamquam  alioqui  generaliter  verum  est,  doctrinam  evangelii  suapte  natura  ad  aedificandum  valere,