27:118  rapporter  toute  ceste  doctrine:  c'est,  que  la  Loy  de  Dieu  soit  en  nos  coeurs  et  en  nos  ames.  Car  si  nous  l'avons  devant  nos  yeux,  que  nous  l'ayons  au  bout  de  la  langue,  et  qu'il  semble  qu'elle  nous  soit  fort  recommandee,  cependant  que  le  coeur  se  tienne  la  serre,  et  qu'il  n'y  ait  nul  courage  de  servir  a  Dieu:  il  est  vray  que  nous  tromperons  les  hommes,  mais  cependant  nous  ne  ferons  qu'acquerir  plus  griefve  condamnation  devant  Dieu  sur  nous.  Que  donc  nous  ayons  la  Loy  de  Dieu  escrite,  que  nous  ayons  les  sentences  par  les  parois  comme  peintures,  que  nous  en  ayons  memoire  et  soir  et  matin:  mais  que  ce  ne  soit  pas  pour  nous  acquitter,  comme  si  Dieu  estoit  paye  en  telle  monnoye.  Quoy  donc?  Que  nous  taschions  qu'elle  soit  tellement  engravee  en  nos  coeurs  que  iamais  elle  ne  s'en  efface:  voire  en  nos  coeurs,  et  en  nos  ames:  c'est  a  dire,  que  toutes  nos  affections  en  soyent  possedees.  Car  c'est  la  ou  il  nous  faut  garder  la  parolle  de  Dieu.  Mais  quoy?  Nous  voyons  ce  que  dit  S.  Iaques  auiourd'huy  plus  que  iamais,  que  ceux  qui  viennent  ouyr  la  parolle  de  Dieu,  profitent  autant  comme  s'ils  regardoyent  en  un  miroir:  ils  s'en  vont,  et  cela  s'esvanouit.  Qu'aura  gagne  un  homme,  quand  il  se  sera  regarde  en  un  miroir?  Car  si  tost  qu'il  aura  tourne  la  face,  ceste  figure  se  passe.  Ainsi  en  est-il:  qu'au  lieu  que  nous  devrions  estre  transfigurez  en  l'image  de  Dieu  (comme  S.  Paul  nous  enseigne  en  la  seconde  aux  Corinthiens,  et  que  c'est  aussi  la  vertu,  et  l'efficace  de  l'Evangile,  de  faire  que  nous  soyons  transfigurez  en  la  gloire  de  Dieu,  quand  nous  le  contemplerons  en  la  personne  de  Iesus  Christ)  nous  venons  ici  comme  pour  passe-temps:  et  puis  tout  s'escoule,  qu'il  n'y  a  alors  nulle  substance  ni  vertu.  Et  voila  comment  la  semence  tant  precieuse  de  l'Evangile  perit.  Car  elle  tombe  sur  les  pierres,  qu'elle  ne  prend  point  racine.  On  pourra  perdre  beaucoup  de  bled,  quand  on  le  iettera  sur  une  terre  seiche,  ou  au  milieu  du  chemin,  ou  sur  des  pierres:  car  les  oiseaux  mangeront  tout  incontinent.  Et  ainsi  ne  nous  esbahissons  point  si  la  parolle  de  Dieu  n'a  nulle  entree  en  nous:  car  nos  coeurs  devroyent  estre  cultivez,  comme  si  une  charrue  avoit  passe  sur  une  terre.  Or  il  n'y  a  nulle  entree,  ni  ouverture.  La  parolle  de  Dieu  donc  nous  sera  bien  donnee  comme  semence:  mais  cependant  elle  ne  profite  point,  le  diable  l'a  incontinent  ravie,  d'autant  qu'elle  n'entre  point  iusques  a  nos  ames,  et  en  nos  coeurs.  Voila  pourquoy  i'ay  dit  que  tout  ce  que  Moyse  traitte  des  fronteaux,  des  bracelets,  des  escriteaux  qu'on  fait  par  les  maisons,  que  cela  se  doit  rapporter  a  ce  qui  est  dit:  que  nous  n'aurons  rien  gagne,  quand  la  Loy  nous  aura  este  publiee,  que  nous  n'y  pourrons  rien  comprendre  iusques  a  tant  qu'elle  ait