21:118  luy  avoit  commise,  c'est  la  ou  il  faut  que  i'admire  la  grande  sagesse  de  Dieu  tournant  toutes  choses  a  sa  gloire,  surtout  en  ses  organes  et  instrumens  plus  singuliers.  Ceux  qui  ont  veu  et  cognu  a  quelles  gens  il  a  eu  affaire  le  plus  souvent,  les  choses  que  Dieu  a  declarees  et  faites  par  luy,  les  circonstances  des  temps  et  des  lieux:  ceux-la  peuvent  iuger  de  quoy  une  telle  vehemence,  vehemence,  di-ie,  vrayement  prophetique,  a  servi  et  servira  a  toute  la  posterite.  Et  ce  qui  le  rendoit  plus  admirable,  estoit  que  n'ayant  et  ne  cerchant  rien  moins  que  ce  qui  est  tant  requis  par  ceux  qui  se  veulent  faire  craindre  par  une  apparence  exterieure,  il  faloit  que  les  plus  obstinez  et  pervers  flechissent  sous  la  grande  vertu  de  Dieu,  environnant  son  fidele  et  irreprehensible  serviteur.  Ceux  qui  liront  ses  escrits  et  cercheront  droitement  la  gloire  de  Dieu,  y  verront  reluire  ceste  maieste  dont  ie  parle.  Quant  a  ceux  qui  traittent  auiourd'huy  la  religion  comme  les  affaires  politiques,  plus  froids  que  glace  aux  affaires  de  Dieu,  plus  enflambez  que  feu  en  ce  qui  concerne  leur  particulier,  et  qui  appellent  colere  tout  ce  qui  est  dit  plus  franchement  qu'il  ne  leur  plaist:  comme  il  n'a  iamais  tasche  de  plaire  a  telles  gens,  aussi  feroye-ie  conscience  de  m'amuser  a  leur  respondre.  Que  diroyent  donc  ces  sages  gens  et  si  attrempez  (pourveu  qu'il  ne  soit  question  que  de  Dieu),  s'ils  avoyent  senti  [Z  3]  de  plus  pres  une  telle  colere?  Ie  m'asseure  qu'ils  s'en  fussent  aussi  mescontentez,  comme  ie  m'estime  et  estimeray  heureux  tout  le  temps  de  ma  vie  d'avoir  iouy  d'une  si  grande  et  rare  vertu  en  public  et  en  particulier.  Pour  la  fin,  ie  puis  protester  en  verite  que  iamais  ie  ne  me  sauroye  lasser  de  me  consoler  en  l'absence  d'un  tel  et  si  excellent  personnage,  en  le  me  representant  par  le  discours  de  ses  vertus  tant  rares  et  exquises.  Et  combien  que  ie  ne  puisse  sans  merveilleux  regret  penser  a  sa  mort,  icelle  mesmes  toutesfois  me  console  merveilleusement,  quand  ie  considere  qu'elle  a  este  telle  que  c'est  comme  la  couronne  et  l'ornement  de  toute  sa  vie.  Il  reste  que  ainsi  qu'il  a  pleu  a  Dieu  le  faire  parler  encore  par  ses  tant  doctes  et  saincts  escrits,  il  soit  aussi  escoute  par  la  posterite  iusques  a  la  fin  du  monde,  quand  nous  verrons  nostre  Dieu  tel  qu'il  est,  pour  vivre  et  regner  eternellement  avec  luy.  Ainsi  soit-il.  De  Geneve,  ce  19.  d'Aoust  1564.  2  Eois  Chap.  2.  et  13.  Mon  pere,  mon  pere,  chariot  dIsrael  et  sa  chevalerie.  8*