20:118  fero,  et  quidem  ut  in  attenta  eius  lectione  sedulo  te  exerceas.  Nam  quum  adolescentes  oblectet  rerum  veterum  cognitio,  mox  ad  eos  annos  pertinges,  in  quibus  historia  tam  creationis  mundi  quam  vetustissimae  ecclesiae  non  minore  cum  fructu  quam  oblectatione  te  occupet.  Et  certe,  si  merito  pravam  hominum  socordiam  damnat  Paulus,  quia  illustre  gloriae  Dei  speculum,  quod  illis  in  mundi  opificio  assidue  offertur^  clausis  oculis  praetereunt,  atque  ita  iniuste  supprimunt  veritatis  lucem:  non  minus  turpis  ac  pudenda  fuit  quae  saeculis  fere  omnibus  grassata  est  originis  et  creationis  humani  generis  ignorantia.  Et  certe  paulo  post  conditam  Babylonem  credibile  est  earum  rerum  memoriam  obsolevisse,  quas  assiduo  sermone  agitari  celebrarique  decuerat.  Nam  quum  profanis  hominibus  sua  dispersio  quaedam  a  puro  Dei  cultu  emancipatio  esset,  curae  illis  non  fuit,  ad  quascunque  appellerent  terrae  plagas,  quod  de  creato  et  instaurato  mundo  a  patribus  audierant  secum  deferre.  Ita  factum  est  ut  nulla  gens,  exceptis  tantum  Abrahae  posteris,  vel  ex  quo  fonte  orta  esset  ipsa,  vel  quando  coepisset  esse  universum  hominum  genus,  duobus  continuis  annorum  millibus  sciverit.  Nam  quod  libros  Mosis  Ptolemaeus  tandem  in  graecam  linguam  vertendos  curavit,  laudabile  magis  quam  fructuosum  (tunc  quidem  temporis)  fuit  eius  studium:  quando  lumen,  quod  e  tenebris  eruere  conatus  erat,  nihilominus  hominum  incuria  suffocatum  delituit.  Unde  colligere  promptum  est,  qui  ad  cognoscendum  mundi  opificem  totos  ingenii  nervos  intendere  debuerant  maligna  potius  impietate  hoc  captasse  ut  sponte  caecutirent.  Floruerunt  interea  liberales  doctrinae,  viguerunt  praeclara  ingenia,  lucubrationes  omne  genus  fuerunt  editae,  atqui  de  mundi  conditi  historia  altum  silentium.  Quin  summus  philosophus,  qui  et  acumine  et  eruditione  reliquos  omnes  antecelluit,  mundum  aeternum  esse  disputans  quidquid  habebat  solertiae  huc  applicuit  ut  Deum  sua  gloria  fraudaret.  Quanquam  paulo  religiosior  fuit  eius  magister  Plato,  seque  aliquo  uberioris  notitiae  gustu  imbutum  ostendit:  exigua  tamen  quae  delibat  veritatis  principia  tot  figmentis  corrumpit  ac  miscet  ut  magis  noceat  quam  prosit  fictitium  illud  docendi  genus.  Qui  vero  ad  scribendas  historias  studium  suum  contulerunt,  homines  ingeniosi  et  literis  expoliti,  quum  pleno  ore  iactent  se  ultimae  vetustatis  fore  testes,  antequam  ad  Davidis  aetatem  appellant,  multa  et  turbida  faece  perfundunt  suas  lucubrationes:  supra  vero  dum  conscendunt  immensam  trahunt  mendaciorum  colluviem.  Tantum  abest  ut  ad  prima  mundi  exordia  sincero  liquidoque  narrationis  contextu  perveniant.  Volentes  autem  nescisse  quod  non  procul  quaerendum  erat,  si  modo  ad  verum  discendum  animos  adiicere  placuisset,  claro  documento  sunt  Aegyptii:  quorum  prae  foribus  quum  accensa  esset  verbi  Dei  8*