8:116  cognue,  que  nous  voyons  la  raison  pourquoy  il  fait  cecy  ou  cela:  mais  tant  y  a,  que  tout  ce  qu'il  fait  a  une  bonne  fin  et  droicte.  Exemple:  Voila  les  guerres  qui  se  font  au  monde:  ce  n'est  pas  sans  qu'il  s'y  commette  de  grans  excez,  et  voire  des  choses  si  espouvantables,  qu'elles  nous  devroyent  faire  dresser  les  cheveux  en  la  teste.  Qu'ainsi  soit,  s'il  se  commet  seulement  un  meurtre,  voila  une  chose  horrible  :  mais  en  une  guerre  il  s'en  commettra  cent  mille.  Si  on  pille  le  bien  d'un  homme,  voila  une  cruaute  bien  grande:  il  y  aura  cent  mille  maisons  pillees  et  saccagees  en  temps  de  guerre.  Apres  s'il  se  commet  des  blasphemes,  deux  ou  trois,  on  dira:  La  grand  mal-heurte!  Et  en  une  guerre  il  y  aura  des  blasphemes  infinis  :  voire  et  si  execrables,  que  c'est  horreur  seulement  d'y  penser.  Il  y  aura  aussi  des  paillardises,  des  ravissemens  de  filles  et  de  femmes,  et  autres  choses  enormes.  Or  maintenant  si  est-ce  que  les  guerres  ne  se  font  point  sans  la  volonte  de  Dieu,  et  sans  sa  disposition.  C'est  une  chose  certaine  [page  60],  et  la  saincte  Escriture  est  pleine  de  ceste  doctrine-la:  car  il  est  dit,  que  Dieu  fait  briser  les  lances,  fait  cesser  la  bataille,  aussi  qu'il  assemble  les  armees,  qu'il  les  fait  preparer  a  la  bataille,  que  les  rois  et  les  princes  sont  comme  ses  soldats,  lesquels  il  met  en  oeuvre;  qu'il  les  conduit,  voire,  et  qu'il  les  mene  comme  par  la  main;  que  ce  ne  sont  que  ses  dards,  ses  fleches,  ses  espees  et  ses  coignees.  Voila  que  l'Escriture  nous  en  monstre.  Et  comment  est-ce  que  Dieu  fait  ces  choses?  Y  a-il  iniquite  en  luy?  Il  est  bien  certain  que  non.  Mais  il  envoye  ses  verges  au  monde,  et  par  un  iuste  iugement,  il  nous  punit  comme  il  luy  plaist;  et  combien  que  nous  ne  voyons  point  encores  la  raison,  si  faut-il  que  nous  cognoissions  que  tout  ce  qu'il  fait  est  iuste.  Et  dont  voila  Iob  qui  ne  s'enquiert  point  pourquoy  Dieu  luy  avoit  oste  tout  son  bien,  qu'il  l'en  avoit  despouille  du  tout.  Il  est  vray  qu'il  dispute  fort  sur  cela,  et  dit  que  ce  n'est  point  pour  ses  pechez.  Mais  tant  y  a  neantmoins,  qu'il  conclud  que  cela  ne  luy  est  point  advenu  sans  la  providence  [page  61]  de  Dieu;  que  tout  le  mal  qu'il  enduroit,  combien  qu'il  fust  dur  a  porter,  ne  laisse  point  d'estre  adoucy  par  la  patience  qu'il  en  avoit.  Et  de  faict,  murmure-il  contre  Dieu?  Non,  mais  il  dit:  Le  Seigneur  me  l'avoit  donne,  il  me  l'a  oste:  son  Nom  soit  benit!  et  ne  parle  point  en  hypocrisie,  mais  en  verite.  Apprenons  donc  que  quand  Dieu  fera  les  choses,  encores  qu'aucune  raison  ne  nous  apparoisse,  neantmoins  nous  ne  laissions  point  d'adorer  son  conseil  et  son  iugement,  et  confesser  qu'il  est  iuste  et  equitable;  et  si  neantmoins  nous  avons  les  yeux  esblouys,  et  si  ceste  clarte  nous  est  incomprehensible,  toutesfois  Dieu  nous  declarera  ce  qui  nous  est  maintenant  incognu;  voire  quand  il