52:116  corpus.  Ideo  nihil  quam  miseris  hominibus  illudere,  qui  umbras  illis  obiicerent.  Deinde  regnum  Christi  spirituale  nequaquam  esse  occupatum  caducis  et  corruptibilibus  elementis.  Tertio,  morte  Christi  interiisse  tales  observationes,  ne  quid  ad  nos  pertineant.  Quarto,  Deum  esse  unicum  legislatorem  nostrum.  Quidquid  contra  ingeri  poterit,  etiam  si  quid  habeat  fulgoris,  species  est  evanida.  Secundo  satis  habuit  admonere  Colossenses  ne  inanium  rerum  obiectu  deciperentur  :  illis  improbandis  necesse  non  fuit  longius  immorari.  Tritum  enim  inter  omnes  pios  esse  debet,  non  metiendum  esse  Dei  cultum  sensu  nostro:  nec  ideo  cultum  aliquem  esse  legitimum,  quia  nobis  arrideat.  Tritum  et  illud,  hanc  humilitatem  nos  debere  Deo,  ut  simpliciter  obediamus  eius  iussis,  ne  innitamur  nostrae  prudentiae,  ete.  Humilitatis  vero  erga  homines  hanc  esse  metam,  ut  per  charitatem  se  quisque  aliis  submittat.  Quum  autem  contendunt,  ciborum  abstinentia  reprimi  carnis  petulantiam,  facilis  est  responsio:  non  ideo  abstinendum  esse  ab  aliquo  certo  cibo,  tanquam  immundo,  sed  frugaliter  vescendum  esse  quibus  vescimur:  tum  ut  sobrie  et  temperanter  dispensemus  Dei  dona,  tum  ut  ne  impliciti  largiore  cibo  et  potu  obliviscamur  quae  Dei  sunt.  Quare  sufficiebat  dicere  has  esse  larvas:  ut  moniti  Colossenses  sibi  caverent  a  falso  praetextu.  Ita  hodie  papistas  non  deficiunt  speciosi  praetextus,  quibus  suas  leges  quantumvis  partim  impias  et  tyrannicas,  partim  futiles  ac  nugatorias,  commendent.  Verum  ubi  illis  omnia  concesserimus,  manet  tamen  ista  Pauli  refutatio,  quae  sola  satis  superque  est  ad  discutiendos  illorum  fumos.  Ut  taceam  quam  procul  distent  ab  illa  tam  honesta  specie  quam  Paulus  describit.  Prima  hodie  sanctitas  papatus  est  in  monachatu.  Qualis  autem  ea  sit,  pudet  ac  piget  commemorare,  ne  adeo  tetrum  foetorem  moveam.  Porro  hic  considerare  operae  pretium  est,  quam  proclive  sit,  imo  quam  praeceps  feratur  hominis  ingenium  ad  fictitios  cultus.  Nam  hic  graphice  depingit  apostolus  veteris  monachatus  statum  :  qui  centum  post  mortem  eius  annis  perinde  invaluit,  ac  si  nunquam  verbum  fecisset.  Mire  ergo  insanus  hominum  ardor  ad  superstitionem,  qui  tam  aperta  Dei  sententia  cohiberi  non  potuit  quominus  erumperet,  quod  testantur  historiae.  Non  in  honore  aliquo.  Honor  curam  significat,  ex  usu  linguae  hebraicae.  Viduas  honora:  hoc  est,  earum  rationem  habe.  Id  autem  Paulus  vituperat,  quod  abiicere  corporis  curam  doceant.  Nam  sicuti  vetat  Deus,  ne  praeter  modum  indulgeamus  corpori  :  ita  quantum  necesse  est  illi,  dari  praecipit.  Ideo  Paulus  ad  Romanos  cap.  13,  14  non  simpliciter  damnat  carnis  sollicitudinem,  sed  quae  servit  cupiditatibus.  Ne  habeatis  carnis  curam  (inquit)  ad  concupiscentias,  Quid  ergo  vitiosum  esse  notat