50:116  omni  accessu  doctrinae  Christi.  Quare  hinc  faciendum  exordium,  ut  qui  sapiens  est,  stultus  fiat:  hoc  est,  propria  intelligentia  nos  abdicemus,  renuntiemus  carnis  prudentiae:  atque  ita  vacuas  mentes  offeramus  Christo,  ut  eas  impleat.  Notanda  autem  loquutio,  quod  dicit,  captivam  se  ducere  omnem  cogitationem.  Perinde  enim  valet  ac  si  dixisset,  continendam  esse  et  fraenandam  libertatem  humani  ingenii,  ne  quid  extra  Christi  doctrinam  sapiat:  deinde  non  aliter  coerceri  posse  eius  audaciam,  nisi  veluti  captivum  teneatur.  Hoc  autem  fit  ductu  spiritus,  ut  se  in  ordinem  redigi  sustineat  et  maneat  in  captivitate  voluntaria.  6.  In  promptu  habemus  vendictam.  Hoc  addidit,  ne  se  audacia  efferrent  homines  petulantes  adversus  eius  ministerium,  quasi  impune  id  facturi  essent.  Dicit  ergo,  non  modo  sibi  datam  virtutem  ad  cogendos  in  obsequium  Christi  voluntarios  discipulos,  sed  etiam  ad  ulciscendos  rebelles  :  neque  suas  minas  inania  esse  terriculamenta,  sed  habere  paratam  exsequutionem,  quemadmodum  vulgo  dicitur.  Porro  vendicta  haec  fundata  est  in  Christi  verbo  (Matth.  18,  18):  Quodcunque  ligaveritis  super  terram,  erit  ligatum  et  in  coelo.  Tametsi  enim  non  statim  fulminat  Deus,  quum  minister  sententiam  protulit:  ratum  tamen  est  iudicium  et  suo  tempore  implebitur.  Intellige  semper,  ubi  minister  spiritualibus  armis  pugnat.  Aliqui  de  corporalibus  poenis  accipiunt,  quibus  apostoli  in  contumaces  aut  impios  vendicabant.  Quemadmodum  Petrus  Ananiam  et  Sapphiram  morte,  Paulus  Elymam  magum  caecitate  percussit.  Verum  alter  sensus  melius  congruit.  Neque  enim  semper  aut  promiscue  usi  sunt  illa  facultate  apostoli.  Paulus  autem  generaliter  loquitur:  quod  vendictam  in  manu  habeat  adversus  omnes  inobedientes.  Quum  impleta  fuerit.  Quam  prudenter  cavet  ne  quos  alienet  nimia  asperitate.  Quia  enim  minatus  fuerat  poenam  rebellibus,  ne  videatur  eos  lacessere,  testatur  aliud  sibi  munus  iniunctum  esse  erga  eos:  nempe  ut  tantummodo  reddat  Christo  obsequentes.  Et  certe  hic  proprius  est  evangelii  finis,  quemadmodum  initio  et  in  fine  epistolae  ad  Romanos  1,  5,  et  16,  26  docet.  Quare  hunc  ordinem  diligenter  tenere  debent  omnes  christiani  doctores,  ut  prius  studeant  placide  obedientiam  ab  auditoribus  impetrare,  eousque  ut  comiter  invitent  quam  prosiliant  ad  poenam  rebellionis.  Unde  et  solvendi  mandatum  prius  dedit  Christus  quam  ligandi.  7.  Quae  secundum  faciem  sunt,  videtis.  Si  quis  sibi  confidit  quia  sit  Christi:  hoc  reputet  etiam  ex  se  ipso  rursum,  quod  sicuti  ipse  Christi,  ita  et  nos  Christi.  8.  Nam  etsi  abundantius  glorier  de  potestate  nostra,  quam  dedit  nobis  Dominus  in  aedificationem,  et  non  in  destructionem  vestram:  non  pudefiam.  9.  Ne