44:115  115  IN  HAGGAEUM  116  simul  etiam  purificet  opera:  quia  regeniti  spiritu  Dei  nos  ipsos  primum,  deinde  nostra  offerimus.  Sed  quia  purgatio  haec  nunquam  reperietur  plena  in  hominibus,  ideo  subsidium  accedere  necesse  est  ex  gratuita  acceptatione.  Purificantur  ergo  corda  nostra  fide,  quia  Deus  non  imputat  nobis  immunditiem,  quae  residua  est  et  quae  posset  inficere  opera  nostra.  Sicuti  ergo  Deus  gratam  habet  puritatem,  quae  nondum  perfecta  est,  ita  facit  ne  contagio  ad  opera  ipsa  perveniat.  Abel  quum  Deo  sacrificia  offerret,  erat  quidem  integer,  quatenus  nihil  erat  in  ipso  fictum  vel  duplex:  sed  scimus  fuisse  hominem  circumdatum  infirmitate.  Oportuit  ergo  quod  erat  pollutionis  in  ipso  residuum  deleri  Christi  gratia.  Hinc  factum  est  ut  sacrificia  eius  placerent:  quia  sicuti  acceptus  fuit,  ita  Deus  amplexus  est  quidquid  ab  ipso  profectum  erat.  Nunc  ergo  videmus  quomodo  naturaliter  displiceant  homines  Deo  cum  suis  operibus,  et  nihil  possunt  afferre  nisi  vitiosum,  foetidum  et  abominabile.  Videmus  rursus  quomodo  filii  Dei  postquam  eos  spiritu  suo  regenuit,  puri  ad  eum  accedant,  et  simul  offerant  pura  sacrificia.  Puri  accedunt,  quia  illis  propositum  est  se  ipsos  absque  fictione  addicere  Deo.  Sed  quoniam  affectus  ille  nunquam  perfectus  est,  ideo  supplet  Deus  defectum  illum  gratuita  imputatione,  quia  perinde  amplectitur  servos  suos,  ac  si  in  solidum  formati  essent  ad  omnem  iustitiam.  Et  eadem  etiam  ratione  probat  ipsorum  opera  quoniam  abstersae  sunt  omnes  maculae,  quae  merito  gratiam  omnem  detrahere  poterant  nisi  sepulta  esset  omnis  immundities  sanguine  Christi,  et  5^  per  fidem.  Hinc  colligimus  non  esse  cur  se  quispiam  fallat  vanis  blanditiis,  ubi  studuerit  magna  pompa  Deum  placare:  quia  exordium  hoc  semper  requiritur,  de  quo  hic  agit  propheta,  nempe  ut  homo  ipse  purus  sit  in  anima,  hoc  est,  ut  interior  puritas  praecedat  quidquid  est  operum.  Et  quamvis  haec  doctrina  passim  occurrat  apud  omnes  prophetas,  quia  tamen  perstringit  nobis  oculos,  et  omnes  sensus  excaecat  hypocrisis,  ideo  probe  nobis  meditanda  est:  et  non  tantum  notandus  est  hic  locus,  sed  etiam  alii  similes,  ubi  rident  prophetae  populi  diligentiam,  quia  satageret  in  sacrificiis  et  externis  figuris:  negligeret  autem  praecipuum  caput,  hoc  est,  veram  cordis  puritatem.  Et  simul  etiam  in  ultimo  versu  notandum  est  quod  dicit  propheta  sic  esse  omne  opus  manuum  ipsorum,  et  quidquid  offerebant.  Videtur  hoc  in  speciem  nimis  esse  durum,  damnari  ipsa  sacrificia  quasi  polluta.  Sed  non  mirum  est  repudiari  a  Deo  tales  cultus  fictitios,  quibus  ipsum  magno  probro  afficiunt  homines  profani,  quia  vellent  eum  transfigurare  pro  suo  arbitrio,  quasi  posset  mulceri  vel  crepundiis,  vel  aliis  nugis.  Hoc  ergo  nimis  indignum  est  ludibrium,  quo  Deum  afficiunt  homines  dum  ita  obtrudunt  externas  caeremonias,  et  non  respiciunt  eius  naturam:  quia