6:113  CATECHISMUS  GENEVENSIS.  LE  MINISTRE.  Tu  entens  donc  que  l'efficace  des  Sacremens  ne  gist  pas  en  l'element  exterieur:  mais  procede  toute  de  l'Esprit  de  Dieu.  L'ENFANT.  Voire:  selon  que  Dieu  veut  besongner  par  les  moyens  qu'il  a  instituez,  sans  deroguer  a  sa  puissance.  LE  MTNISTEE.  Et  qui  meut  Dieu  de  faire  cela?  L'ENFANT.  Pour  le  soulagement  de  nostre  infirmite.  Car  si  nous  estions  de  nature  spirituelle  comme  les  Anges,  nous  pourrions  contempler  sprituellement,  et  luy  et  ses  graces:  mais  ainsi  que  nous  sommes  enveloppez  de  noz  corps,  nous  avons  mestier  qu'il  use  de  figures  envers  nous,  pour  nous  representer  les  choses  spirituelles  et  celestes.  Car  autrement  nous  ne  les  pourrions  comprendre.  Et  aussi  il  nous  est  expedient,  que  tous  noz  sens  soyent  exercez  en  ses  sainctes  promesses,  pour  nous  confermer  en  icelles.  LE  MINISTRE.1)  Puis  que  Dieu  a  introduit  les  Sacremens  pour  nostre  necessite,  ce  seroit  orgueil  et  presumption,  de  penser  qu'on  s'en  peust  passer.  L'ENFANT.  Ouy  pour  certain.  Tellement,  que  quiconque  s'abstient  voluntairement  de  l'usage,  pensant  qu'il  n'en  a  point  de  besoing,  mesprise  Iesus  Christ,  reiecte  sa  grace,  et  esteinct  son  sainct  Esprit.  LE  MINISTRE.  Mais  quelle  certitude  de  grace  peuvent  donner  les  Sacremens,  veu  que  bons  et  mauvais  les  receoivent  ?  L'ENFANT.  Combien  que  les  incredules  et  meschans  aneantissent  la  grace  qui  leur  est  presentee  par  les  Sacremens,  si  ne  s'ensuit  il  pas  que  la  propriete  d'iceux  ne  soit  telle.  LE  MINISTRE.  [fol.  58]  Comment  donc,  et  quand  est-ce  que  les  Sacremens  produisent  leur  effect?  L'ENFANT.  Quand  on  les  receoit  en  Foy,  cherchant  seulement  Iesus  Christ  et  sa  grace.  LE  MINISTRE.  Pourquoy  dis-tu  que  nous  y  devons  chercher  Iesus  Christ?