22:112  Lenfant.  Tu  ne  iureras  point  faulsement  par  le  nom  du  seigneur  ton  Dieu.  Le  maistre.  Quest  il  icy  requis?  Lenfant.  Que  ie  m'acoustume  d'avoir  en  horreur  pariurement  et  toute  chose  par  laquelle  le  nom  de  Dieu  est  deshonore.  Mais  au  contraire  que  ie  m'efforce  de  servir  son  sainct  nom  par  tous  moyens  que  faire  pourray.  Le  maistre.  Cest  bien  dict.  Pourtant  gardes  toy  devant  toutes  choses  que  tu  ne  iures  en  vain  ou  faulsement,  que  tu  ne  parles  mal,  que  tu  ne  mettes  en  avant  propos  legiers  de  Dieu  et  des  choses  sainctes,  mais  loue  le  en  toutes  choses  comme  ton  Dieu  et  autheur  de  ton  salut.  Poursuys  le  reste.  Lenfant  Ayes  en  memoire  le  iour  du  repos  affin  quil  te  soit  sacre.  Le  maistre.  Qu'est  il  commande  en  cecy?  Lenfant  II  nous  est  commande  que  nous  convenions  voluntiers  en  la  congregation  chrestienne  et  que  nous  nous  adioingnions  avecques  toute  diligence  en  sa  parolle  et  sacrementz.  Le  maistre.  Adonne  toy  tous  les  iours  a  cecy  et  mesmement  sil  est  iour  de  repos.  Passez  oultre.  Lenfant  Ayes  ton  pere  et  ta  mere  en  honneur  et  reverence.  Le  maistre.  Combien  s'ettend  ce  commandement  icy?  Lenfant  Que  ie  face  honneur  et  service  et  obeissance  a  mes  parens,  au  magistrat,  a  mes  precepteurs  et  a  tous  ceux  a  qui  ie  suis  commis.