58:110  honnestete-la,  que  nul  ne  se  iouoit  trop  privement  avec  la  femme  de  autrui,  et  qu'il  n'y  avoit  point  de  gestes  dont  on  peust  mal  subsonner,  comme  nous  le  voions  ici,  C'est  ta  femme  (dit-il)  pour  vray.  Et  sur  quoy  le  conclud-il?  C'est  d'autant  que  ce  vice-la  n'estoit  pas  accoustume  et  n'estoit  pas  venu  en  usage  ni  en  possession  entre  les  hommes,  en  sorte  qu'on  ne  peust  pas  discerner  entre  mariage  et  paillardise.  Or  ceci  nous  apprend  de  converser  tellement  les  uns  entre  les  autres,  qu'il  n'y  ait  point  de  regards  impudiques,  ne  de  gestes  vicieuses,  que  nous  soions  tellement  purs  de  tout  mal,  que  mesme  selon  les  hommes  nous  ne  donnions  nulle  occasion  de  mal  parler,  ne  mesme  de  mal  penser  de  nous.  Vray  est  qu'ici  il  est  parle  de  quelque  geste,  qui  estoit  trop  prive  a  un  homme  estrange:  car  il  ne  faut  pas  que  nous  soions  si  austeres,  que  nous  ne  puissions  converser  ensemble,  sans  donner  occasion  de  mal:  et  cependant  vivre  en  privaute,  et  mesme  nous  resiouissans  avec  toute  honnestete,  monstrans  que  nous  avons  et  les  coeurs  et  les  yeux  chastes  et  tous  nos  sens.  Mais  quand  Isaac  s'est  ainsi  ioue  avec  sa  femme,  il  y  a  eu  quelque  signe  de  mari  a  femme,  tellement  qu'on  pouvoit  iuger,  ou  cest  homme  est  un  paillard,  ou  bien  il  faut  qu'il  soit  le  mari.  Or  de  l'estimer  paillard,  on  ne  pouvoit,  a  cause  qu'il  avoit  converse  honnestement  en  crainte  de  Dieu,  et  au  contentement  d'un  chacun,  au  pays  de  Gerar:  il  faut  donc  qu'on  le  tiene  pour  mari.  Or  la  dessus  Isaac  confesse  sa  faute:  mais  il  la  confesse  en  allegant  qu'il  craignoit  qu'on  ne  le  tuast.  Ici  les  choses  sont  recitees  plus  brievement  que  nous  n'avons  veu  au  paravant.  Car  Abraham  a  este  redargue  plus  asprement:  et  aussi  il  en  fait  excuse  plus  longue.  Ie  savoie  (dit-il)  qu'il  n'y  avoit  point  de  crainte  de  Dieu  en  ce  pays.  Seulement  Isaac  dit,  Ie  craignoie  qu'on  ne  me  tuast.  Or  ici  il  monstre,  qu'encores  que  Rebecca  fust  sa  soeur,  neantmoins  que  son  intention  a  este  de  desguiser  la  verite:  il  passe  condamnation.  Ainsi  quand  nous  aurons  pour  un  temps  voulu  estre  trop  subtils,  que  nous  ne  soions  pas  si  obstinez  a  maintenir  en  tout  et  par  tout  ce  que  nous  avons  dit  et  fait  (combien  qu'il  y  ait  eu  de  la  faute)  que  nous  ne  la  recognoissions  franchement.  Car  Isaac  pouvoit  dire  Oui,  c'est  ma  soeur.  Mais  encore  qu'il  l'eust  dit,  il  aiouste  toutesfois  qu'on  l'a  peu  reprendre,  comme  aussi  Abimelech  le  fait:  car  il  void  qu'il  a  iuste  raison  de  condamner  Isaac:  et  a  ceste  cause  il  lui  dit,  Pourquoy  nous  as-tu  fait  ceci?  Or  nous  avons  a  noter  d'un  coste  ce  qui  a  este  allegue  par  ci  devant:  c'est  assavoir,  que  Dieu  a  reprins  et  chastie  les  Rois  a  cause  de  ses  serviteurs,  combien  qu'ils  fussent  en  petit  nombre,  combien