52:110  prius  dixit,  nunc  extendit  ad  ciborum  dierumque  discrimen.  Circumcisio  enim  prima  initiatio  erat  in  observationem  legis:  alia  deinde  sequebantur.  Iudicare  hic  significat  culpae  reum  facere,  vel  religionem  iniicere,  ita  ut  amplius  liberi  non  simus.  Negat  igitur,  in  potestate  hominum  esse  subiicere  nos  observationi  rituum,  quos  morte  sua  Christus  sustulit:  et  eximit  nos  ab  eorum  iugo,  ne  patiamur  nos  legibus,  quas  tulerint,  illigari.  Christum  autem  tacite  cunctis  mortalibus  opponit,  ne  quis  tam  audacter  se  efferat,  ut  quod  ab  illo  datum  est,  eripere  tentet  In  parte  diei  festi,  TO  fiepoc  aliqui  accipiunt  pro  participatione.  Chrysostomus  ideo  partem  dixisse  arbitratur,  quod  non  omnes  dies  festos  servabant:  neque  etiam  exacte  feriabantur  ex  legis  praescripto:  quod  dilutum  est.  Vide  annon  accipi  possit  pro  segregatione.  Nam  qui  dierum  faciunt  discrimen,  quasi  unum  ab  alio  dividunt.  Talis  partitio  conveniebat  Iudaeis,  ut  dies  praeceptos  sancte  colerent,  ab  aliis  segregando.  Inter  Christianos  talis  divisio  cessavit.  Atqui,  dicet  quispiam,  nos  adhuc  retinemus  aliquam  dierum  observationem.  Respondeo,  nos  dies  nequaquam  servare,  quasi  in  feriis  aliqua  sit  religio:  aut  quasi  fas  non  sit  tunc  laborare:  sed  respectum  haberi  politiae  et  ordinis,  non  dierum.  Atque  id  est  quod  continuo  subiungit.  17.  Quae  sunt  umbra  futurorum.  Ideo  Christianos  ab  illis  servandis  liberat,  quia  umbrae  fuerint,  quo  tempore  Christus  adhuc  quodammodo  absens  erat.  Nam  umbras  opponit  revelationi:  absentiam  vero  exhibitioni.  Qui  ergo  umbras  illas  adhuc  sectantur,  perinde  faciunt  ac  si  quis  hominis  formam  ex  umbra  consideraret,  quum  illum  haberet  coram  in  conspectu.  Nam  Christus  iam  patefactus  est  nobis:  adeoque  illo  tanquam  praesente  fruimur.  Corpus,  inquit,  est  Christi:  hoc  est,  in  Christo.  Nam  substantia  illarum  rerum,  quas  caeremoniae  olim  figurabant,  nobis  exposita  est  ante  oculos  in  Christo,  quia  in  se  continet  quidquid  illae  futurum  designabant.  Ergo  aut  Christi  manifestationem  obruit,  aut  Christum  spoliat  sua  virtute,  et  quasi  inanem  reddit,  qui  caeremonias  revocat  in  usum.  Ideo  si  quisquam  mortalium  iudicis  officium  in  hac  parte  sibi  usurpet,  ne  obsequamur:  quum  Christus  legitimus  iudex  nos  absolvat.  Nam  quum  dicit,  nemo  vos  iudicet:  non  alloquitur  pseudoapostolos:  sed  prohibet  ne  Colossenses  collum  iniquo  iugo  submittant.  Per  se  quidem  abstinere  a  carne  suilla,  nihil  nocet:  sed  perniciosa  est  obligatio,  quia  Christi  gratiam  evacuat.  Si  quis  interroget:  Quid  igitur  sentiendum  de  nostris  sacramentis?  annon  etiam  absentem  Christum  figurant?  Respondeo,  longe  a  caeremoniis  veteribus  differre.  Quemadmodum  enim  pictores  non  exprimunt  primo  ductu  imaginem  vivis  coloribus  et  eiconic&c,  sed  rudes  et  obscuras  lineas  primum  ex  carbone  ducunt:  ita  sub  lege  impolitam