51:110  estions  les  plus  revesches  et  sauvages  du  monde,  si  est-ce  que  nous  pourrons  estre  attirez  a  quelque  cognoissance,  puis  que  Dieu  essaye  par  tous  moyens  de  nous  gagner  a  soy.  Bref,  il  nous  force  de  venir  a  luy,  encores  que  nous  ne  vueillions  point  venir  de  nostre  bon  gre.  Et  si  nous  reculons  au  lieu  d'advancer,  ne  faut-il  pas  que  la  rebellion  soit  plus  qu'insupportable  en  nous?  Ainsi  donc  toutesfois  et  quantes  que  nous  lisons  ce  passage,  combien  qu'il  ne  semble  pas  qu'il  nous  attouche,  et  que  cela  n'ait  este  dit  que  pour  les  Galatiens,  scachons  que  Dieu  nous  reproche  que  son  labeur  periroit  comme  inutile  envers  nous,  sinon  que  nous  fussions  avancez  par  la  doctrine,  quand  elle  nous  sera  souvent  confermee.  Mais  cependant  il  aime  beaucoup  mieux  que  nous  venions  d'un  courage  alegre:  car  il  ne  pretend  point  de  nous  accuser,  ni  de  plaider  contre  nous,  moyennant  que  nous  soyons  si  bien  advisez  de  dire,  Or  ca  voici  mon  Dieu  qui  merite  bien  que  i'approche  de  luy  quand  il  me  feroit  seulement  signe  de  loin.  Or  il  me  convie  si  familierement  que  mervueilles,  et  ne  se  contente  point  d'ouvrir  la  bouche  seulement  pour  un  coup:  mais  il  a  envoye  Moyse  et  tous  les  Prophetes,  et  tous  les  docteurs  qui  sont  en  nombre  infini,  il  a  envoye  ses  Apostres,  il  a  mesmes  envoye  son  Fils  unique,  qui  est  sa  sagesse  et  sa  Parole  eternelle.  Quand  donc  Dieu  sera  si  familier  a  moy  et  mesmes  qu'il  m'esleve  en  une  dignite  si  excellente,  quand  par  tous  moyens  il  me  monstre  sa  sagesse  par  laquelle  il  demande  a  me  gagner  a  soy,  et  qu'il  continue  en  cela  sans  fin  et  sans  cesse,  et  soir  et  matin,  faut-il  que  ie  demeure  la  comme  assopi,  sans  nul  sentiment  ni  apprehension  non,  plus  qu'un  tronc  de  bois?  D'autant  plus  donc  nous  faut-[il  prendre  meilleur  goust  en  la  parole  de  Dieu,  et  y  appliquer  toute  nostre  estude.  Et  voyant  qu'il  n'y  a  rien  de  superflu,  et  que  nous  avons  besoin  d'estre  solicitez  a  nous  y  addonner,  qu'un  chacun  soit  induit  a  s'y  appliquer,  et  que  nous  ne  disions  point  que  la  repetition  d'une  mesme  chose  est  inutile  :  mais  cognoissons  qu'encores  qu'on  ne  nous  apporte  rien  de  nouveau,  qu'il  nous  faut  neantmoins  tousiours  recorder  une  mesme  lecon:  que  quand  Dieu  a  envoye  Moyse,  et  qu'il  a  adiouste  les  Prophetes,  qu'il  a  envoye  ses  Apostres,  et  la  dessus  qu'il  a  voulu  que  sa  doctrine  fust  reduite  par  escrit,  que  tout  cela  s'est  fait  pour  nostre  instruction.  Et  quand  nostre  Seigneur  Iesus  a  este  envoye  au  temps  de  plenitude,  il  a  declare  tout  ce  qui  estoit  requis  pour  nostre  salut.  Et  depuis  il  a  encores  suscite  gens  qui  fussent  organes  de  son  Esprit,  pour  nous  annoncer  sa  volonte,  et  nous  apporter  le  message  de  salut  (comme  il  fait  encores  auiourd'huy),  lesquels  nous  sont  tesmoins  de  ce  qui  autrement  nous  seroit  cache.  Puis  qu'ainsi  est