22:110  Le  maistre.  Par  quelle  oraison?  Lenfant  Par  ceste  cy:  Et  nous  pardonne  noz  offences  ainsi  que  nous  pardonnons  a  ceux  qui  nous  ont  offensez.  Le  maistre.  Pourquoy  dys  tu:  Ainsi  que  nous  pardonnons?  Lenfant  Pour  autant  quil  nous  convient  vrayement  pardonner  a  tous  hommes  quand  nous  requerons  a  Dieu  quil  nous  soit  misericordieux.  Le  maistre.  Mais  que  requiers  tu  oultre?  Lenfant.  Que  nostre  seigneur  ne  permette  que  soyons  menez  par  ladversaire  en  desespoir  ou  en  quelque  autre  peche.  Le  maistre.  Comment  donc  pries  tu?  Lenfant  Et  ne  nous  induys  en  tentation  mais  delivre  nous  du  maling.  Le  maistre.  Que  pries  tu  encore?  Lenfant.  Car  a  toy  est  le  regne  et  la  puyssance  et  la  gloyre  es  siecles  des  siecles.  Le  maistre.  Que  signifient  ces  parolles?  Lenfant.  Icelle  orayson  apporte  avecques  soy  la  louange  de  Dieu  affin  que  luy  rendions  toute  domination  et  puyssance  et  que  par  cela  nous  esperions  quil  nous  exaulcera.  Le  maistre.  Comment  est  ce  que  tu  conclus?