8:11  11  DE  SCANDALIS.  autem  electus,  vobis  etiam  pretiosus  qui  creditis.  Caeterum,  iis  qui  non  credunt,  lapis  quem  reprobaverunt  aedificantes,  lapis  ad  quem  offendant,  petra  ad  quam  impingant  (1  Petr.  2,  4  seqq.).  En  ut  Christus  se  omnibus  offerat  in  fundamentum,  ut  in  templum  Dei  exstruantur.  Ibi  certe  nulla  offensio.  Cur  igitur  offendunt?  quia  in  quo  placide  acquiescere  debebant,  in  eum  caeco  impetu  contumaciter  irruunt.  Quae  tamen  est  hominum  vel  malitia,  vel  corruptela,  videmus,  ut  quod  accidentale  est  Christo,  non  minus  sit  ordinarium,  quam  si  eius  officio  maxime  conveniret.  Nunc  ad  eos  venio  qui  Christi  evangelium  alias  amplecti  non  abnuentes,  volunt  tamen  habere  absque  scandalis.  Cum  Christianis  mihi  negotium  est.  Voluntne  Christum  ab  omni  scandalo  remotum?  Novum  sibi  fabricent:  neque  enim  alius  esse  potest  filius  Dei,  quam  qualis  in  scripturis  praedicatur:  aut  certe  mutent  hominum  ingenia,  totumque  mundum  reforment.  Audimus  quid  scriptura  pronunciet.  Non  cadit  hoc  in  Christi  personam  solum,  sed  in  totam  doctrinam.  Nec  temporale  est,  sed  duraturum  toto  doctrinae  cursu.  Quam  sunt  igitur  praeposteri,  qui  hodie  renascentem  evangelii  doctrinam  hoc  tantum  nomine  repudiant,  quia  in  ea  deprehendunt  quod  a  prophetis  et  apostolis  praedictum  fuit!  Interea  nihilominus  Christiani  censeri  volunt.  Quid  si  in  prima  evangelii  exordia  incidissent,  quo  tempore  nullum  non  scandalorum  genus,  subinde  [pag.  8]  ex  evangelio  scaturiebat?  Quam  celeriter  a  Christo  se  procul  removissent!  Quantum  exhorruissent,  ne  qua  contagione  fuissent  ex  levi  tactu  afflati!  Si  id  se  tunc  facturos  fuisse  negant,  cur  ergo  tam  sunt  hodie  delicati?  Cur  non  easdem  nunc  quoque  agnoscunt  in  Christo  notas?  At  res  est  odiosa  scandalum,  et  modestis  ingeniis  horrenda.  Quis  negat?  Neque  etiam  dico  appetenda  ultro  esse  scandala:  fugiamus  ea  quoad  licet.  Verum,  christiani  hominis  pectus  ita  munitum  esse  oportet,  ut  quidquid  scandalorum  erumpat,  nunquam  loco  moveatur:  ne  vel  minimum  unguem  deflectat  a  Christo.  Ad  hanc  constantiam  qui  non  est  comparatus,  ut  per  omnia  scandala  invictus  perrumpat,  nondum  quid  valeat  christianismus  intelligit.  At  resistere  scandalis  difficile  est  :  praesertim  huic  adeo  tenerae  nostrae  imbecillitati.  Fateor  certe:  sed  postulare,  ut  ab  eo  incommodo  simus  immunes,  cui  sacrosanctum  Christi  et  evangelii  eius  nomen  esse  obnoxium  cernimus:  id  vero  cum  ratione  pugnat.  Proinde,  qui  hodie  scandala  in  causa  esse  obtendunt,  cur  purae  evangelii  doctrinae,  quam  profitemur,  nomen  dare  metuant,  imo  horreant  ad  eam  accedere,  hos  omnes  monitos  esse  velim  ne  sibi  pro  Christo  idolum  comminiscantur.  Fixum  enim  illud  manere  oportet:  si  scandala  omnia  fugere  velimus,  Christum  semel  abnegandum  esse:  qui,