52:11  11  EPIST.  PAULI  AD  PHILIPPENSES  quo  melius  exprimat  quam  honorabile  nobis  obsequium  iniungat  Deus,  quum  nos  hostibus  suis  ad  reddendum  evangelio  suo  testimonium  opponit.  Perinde  enim  est  ac  si  nobis  evangelii  patrocinium  mandaret.  Hac  scilicet  cogitatione  armati  martyres  potuerunt  omnes  impiorum  furores  contemnere  omniaque  tormenta  superare.  Atque  utinam  hoc  in  mentem  veniret  omnibus  qui  ad  confessionem  fidei  vocantur,  se  patronos  esse  delectos  a  Christo  ad  agendam  eius  causam.  Nam  consolatione  tali  subnixi,  animosiores  essent  quam  ut  adeo  facile  ad  perfidam  defectionem  flecterentur.  Verum  quaeret  hic  quispiam,  num  ab  hominum  constantia  pendeat  evangelii  confirmatio.  Respondeo,  Dei  veritatem  per  se  magis  firmam  esse,  quam  ut  opus  habeat  aliunde  fulciri.  Nam  ut  mendaces  simus  omnes,  Deus  tamen  verax  manet.  Sed  non  est  absurdum,  infirmas  conscientias  talibus  adminiculis  in  ea  confirmari.  Habet  igitur  hoc  genus  confirmationis,  cuius  Paulus  meminit,  relationem  ad  homines.  Quemadmodum  nostra  experientia  discimus,  hoc  saltem  tot  martyrum  caedibus  fuisse  profectum,  ut  totidem  quasi  sigillis  evangelium  cordibus  nostris  obsignaretur.  Unde  illud  Tertulliani,  eorum  sanguinem  semen  esse  ecclesiae.  Quem  ego  quodam  carmine  sum  imitatus,1)  8anctus  at  ille  cruor,  divini  assertor  honoris,  Q-ignendam  ad  sobolem,  seminis  instar  erit.  8.  Testis  enim  mihi  est  Deus.  Nunc  expressius  suum  erga  illos  amorem  declarat.  Cuius  approbandi  causa  iusiurandum  adhibet,  idque  merito:  quia  scimus  quam  cara  apud  Deum  sit  ecclesiae  suae  aedificatio.  Erat  autem  in  primis  utile^  Pauli  amorem  probe  esse  testatum  Philippensibus.  Neque  enim  parum  hoc  valet  ad  fidem  doctrinae  faciendam,  quum  persuasus  est  populus  a  doctore  se  amari.  Deum  appellat  testem  veritatis,  qui  solus  est  veritas:  et  sui  affectus,  qui  solus  est  scrutator  cordium.  In  verbo  desiderandi:  species  est  pro  genere:  amoris  autem  signum  est,  quia  desideramus  quae  cara  sunt.  In  visceribus.  Opponit  Christi  viscera  carnali  affectui,  ut  significet  sanctum  ac  pium  esse  suum  amorem.  Nam  qui  secundum  carnem  amat,  respectum  habet  sui  commodi:  et  potest  subinde  pro  rerum  et  temporum  varietate  animum  mutare.  Interim  admonet  ad  quam  regulam  exigi  debeant  fidelium  affectus:  nempe  ut  abdicata  propria  voluntate  Christo  gubernacula  permittant.  Et  certe  non  aliunde  manare  potest  vera  caritas,  quam  ex  Christi  visceribus.  Et  non  leviter  pungere  nos  debet  hic  stimulus,  Christum  sua  viscera  quodammodo  aperire,  quibus  mutuum  inter  nos  amorem  foveat.  9.  Hoc  precor,  ut  caritas.  Redit  ad  precationem,  quam  obiter  tantum  uno  verbo  attigerat.  Exponit  1)  Vide  Epinicion  Opp.  T.  V.  p.  425.