51:11  11  SERMONS  12  nom  souverain,  et  qu'on  cognoisse  que  toute  la  maieste  de  Dieu  apparoist  et  reluist  en  sa  personne.  Voila  comme  nous  ne  devons  point  avoir  honte  de  l'Evangile.  Et  surtout  retenons  bien  ce  qu'il  est  appele  par  sainct  Paul  au  premier  chap.  des  Rom.  la  puissance  de  Dieu  en  salut  a  tous  croyans.  Que  donc  les  mondains,  et  ceux  qui  sont  tant  enflez  d'orgueil  et  d'arrogance  comme  des  crapeaux,  mesprisent  tant  qu'ils  voudront  l'Evangile,  et  qu'ils  perissent  en  leur  malediction:  cependant  que  par  humilite  de  foy  nous  embrassions  le  Fils  de  Dieu  qui  se  presente  a  nous,  a  fin  qu'il  nous  esleve  iusques  a  la  gloire  du  royaume  des  cieux.  Or  il  y  a  d'avantage  que  sainct  Paul  conioint  ici  le  scandale  avec  la  predication  de  l'Evangile  comme  deux  choses  inseparables.  Vray  est  que  nous  devons  fuir  tous  scandales  tant  que  il  nous  sera  possible:  car  mal-heur  sur  celuy  par  qui  le  scandale  advient.  Mais  cependant  si  faut-il  que  Iesus  Christ  regne,  et  qu'il  ait  la  vogue  combien  que  le  monde  se  hurte  contre  luy.  Le  mot  de  Scandale  emporte  rencontre  ou  empeschement,  comme  s'il  y  avoit  un  chemin  bossu  et  pierreux,  qu'il  y  eust  quelques  espines  et  ronces  et  autres  difficultez:  voila  que  c'est  de  donner  scandale.  Or  il  seroit  a  souhaiter  que  Iesus  Christ  marchast,  et  que  tout  le  monde  le  receust,  et  que  rien  n'empeschast  que  l'Evangile  depuis  un  bout  du  monde  iusqu'a  l'autre  ne  fust  publie.  Nous  devons,  (di-ie)  souhaiter  cela  en  tant  qu'en  nous  est.  Cependant  apprenons  que  Dieu  veut  esprouver  l'obeissance  de  nostre  foy  en  ce  qu'il  lasche  la  bride  a  Satan,  qui  dresse  beaucoup  de  scandales  et  de  troubles.  Brief  nostre  Seigneur  Iesus  Christ  n'est  pas  sans  cause  appele  pierre  de  scandale,  et  comme  un  hurt  contre  lequel  chacun  se  vient  achoper,  et  se  rompre  le  col  par  ce  moyen  :  et  faut  qu'en  la  fin  (comme  il  est  dit  en  sainct  Luc)  qu'ils  soyent  brisez  de  ceste  pierre,  car  elle  est  trop  dure  pour  leur  obstination.  Et  ceci  encores  nous  est  bien  utile:  car  nous  voyons  beaucoup  de  gens  si  delicats  que  si  tost  qu'on  ne  s'accorde  point  a  l'Evangile,  il  leur  semble  qu'ils  sont  quittes  et  absous  devant  Dieu  de  ne  point  soustenir  une  telle  querelle.  Si  les  Rois  et  les  Princes  avoyent  fait  publier  a  son  de  trompe  qu'on  ne  bataillast  plus  contre  la  verite  de  Dieu,  chacun  feroit  semblant  d'estre  d'accord:  mais  auiourd'huy  on  verra  la  cruaute  si  grande,  on  verra  les  tyrannies,  les  despitemens,  les  menaces  et  choses  semblables.  Apres  on  verra  que  la  pluspart  des  ennemis  sont  comme  loups  ravissans,  qui  ne  demandent  qu'a  engloutir  tout,  et  sous  ombres  des  biens  ils  ne  cercheront  sinon  que  le  sang  innocent  soit  espandu.  Les  autres  auront  un  zele  enrage,  qu'ils  voudrayent  que  le  nom  de  Dieu  fust  aboli,  la  doctrine  de