48:11  11  IN  ACTA  APOSTOLORUM  12  pecudum  instar  toto  sensu  ad  id,  quod  carni  nostrae  commodum  est,  ferimur.  Ideo  magis  arripimus  quod  praesens  est.  Quare  et  Chiliastas  eodem  videmus  fuisse  delapsos.  Hinc  quoque  factum  est,  ut  vaticinia  omnia  quae  figurate  Christi  regnum  sub  imagine  terrestrium  regnorum  describunt,  ad  carnis  commodum  traherent:  quum  tamen  Dei  consilium  esset  altius  eorum  mentes  evehere.  Nos  vero  ne  iisdem  implicemur  erroribus,  discamus  animos  nostros  ad  evangelii  praeconium  referre,  quod  sedem  Christi  regno  in  cordibus  nostris  statuit.  In  tota  Iudaea.  Primum,  non  unius  diei  laborem  fore  significat,  dum  totum  illis  orbem  assignat  evangelii  doctrina  lustrandum.  Praeterea,  falsam  quam  de  Israele  conceperant  opinionem  oblique  refutat.  Solos  in  eo  ordine  censebant,  qui  ex  Abraham  geniti  erant  secundum  carnem.  Testatur  Christus,  Samariam  aggregandam  esse:  quae  tametsi  loco  vicina,  animis  tamen  maxime  disiuncta  erat.  Testatur  alias  omnes  regiones  et  remotas,  et  profanas  sancto  populo  uniendas  esse,  ut  eiusdem  sint  gratiae  participes.  Quantopere  abhorruerint  Iudaei  a  Samaritanis,  notum  est.  Nunc  quasi  rupta  maceria,  unum  ex  utrisque  fieri  corpus  iubet  Christus,  ut  regnum  suum  ubique  erigatur.  Ierosolymam  et  Iudaeam  nominans,  quas  experti  fuerant  discipuli  infestissimis  hostibus  refertas  esse,  satis  negotii  ac  molestiarum  eos  manere  admonet:  ut  de  propinquo  triumpho  cogitare  desinant.  Neque  enim  parum  horroris  incutere  illis  debuit  prodire  coram  tot  saevissimis  hostibus  ad  inflammandam  eorum  rabiem.  Ac  Iudaeis  quidem  priorem  locum  tribuit,  quia  veluti  primogeniti  erant:  gentes  tamen  omnes,  quae  prius  alienae  a  spe  salutis  fuerant,  promiscue  vocat.  Hinc  enim  discimus  diserto  Christi  mandato  evangelium  ubique  fuisse  praedicatum,  ut  ad  nos  manaret.  9.  Atque  haec  locutus,  videntibus  illis  in  altum  sublatus  est,  et  nubes  subduxit  illum  ab  oculis  eorum.  10.  Quum  autem  essent  defixis  in  coelum  oculis,  eunte  illo,  ecce  viri  duo  adstiterunt  illis  amicti  vestibus  albis:  11.  qui  et  dixerunt:  Viri  Galilaei,  quid  statis  intuentes  in  coelum?  Hic  Iesus,  qui  assumptus  est  a  vobis  in  coelum,  sic  veniet,  quemadmodum  euntem  ipsum  vidistis  in  coelum.  9.  Quid  nobis  prosit  Christi  adscensio,  ex  Institutione  nostra  discant  lectores.  Quia  tamen  unum  est  ex  primis  fidei  nostrae  capitibus,  sedulo  ad  faciendam  eius  fidem  incumbit  Lucas.  Imo  potius,  eam  omni  dubitatione  eximere  Dominus  ipse  voluit,  cum  ita  palam  in  coelum  adscendit  et  aliis  circumstantiis  testatam  fecit  adscensus  sui  certitudinem.  Si  enim  clam  evanuisset,  haesissent  attoniti  discipuli:  nunc  quum  in  edito  et  undique  aperto  ac  patente  loco  constituti,  eundem  quocum  versati  erant,  quem