45:11  11  HARMONIA  EVANGELICA.  12  sanctitatis  exemplar.  Sed  quum  a  perfectione  longe  distet  pium  eorum  studium,  non  potest  sine  venia  placere  Deo.  Quare  iustitia,  quae  in  illis  laudatur,  a  gratuita  Dei  indulgentia  pendet,  qua  fit  ut  quod  reliquum  est  in  ipsis  iniustitiae  non  imputet.  Sic  exponere  necesse  est  quidquid  de  hominum  iustitia  in  scripturis  habetur,  ut  remissionem  peccatorum  non  evertat,  cui  non  aliter  innititur,  quam  suo  fundamento  aedificium.  Qui  simpliciter  exponunt  Zachariam  et  Elisabeth  fide  iustos  fuisse,  quia  gratis  Deo  propter  mediatorem  placuerint,  in  alienum  sensum  torquent  Lucae  verba.  Quod  ad  rem  ipsam  pertinet,  neque  nihil  dicunt,  neque  totum.  Fateor  quidem  iustitiam,  quae  illis  adscribitur,  non  operum  merito,  sed  Christi  gratiae  acceptam  ferri  debere:  Dominus  tamen,  quia  illis  peccata  non  imputavit,  sanctam  illorum  vitam,  licet  imperfectam,  iustitiae  titulo  dignatus  est.  Papistarum  autem  stultitia  nullo  negotio  refellitur:  fidei  iustitiae  opponunt  hanc,  quae  Zachariae  tribuitur:  quam  ut  certum  est  ab  illa  fluere,  ita  subiici  et  illi  subesse  decet,  vel  ut  vulgo  dicunt,  subordinari,  ut  inter  se  non  confligant.  Quod  etiam  in  voce  una  fucum  faciunt,  frivolum  est.  Iustificationes,  inquiunt,  vocantur  legis  praecepta:  ergo  nos  iustificant.  Quasi  vero  negemus  veram  iustitiam  in  lege  tradi,  vel  causemur  doctrinae  culpam  esse,  quod  non  iustificat,  ac  non  potius  in  carne  nostra  infirma  sit.  Ergo  ut  centies  fateamur,  vitam  contineri  in  legis  praeceptis,  nihil  tamen  inde  ad  homines  perveniet,  qui  natura  prorsus  aversi  sunt  a  lege,  et  iam  Dei  spiritu  regeniti  procul  tamen  adhuc  ab  integra  eius  observatione  absunt.  7.  Nec  erat  illis  proles.  Singulari  Dei  consilio  factum  est,  ut  Ioannes  praeter  communem  usitatumque  naturae  ordinem  genitus  sit.  Idem  etiam  in  Isaac  factum  est,  in  quo  rarum  et  memorabile  gratiae  suae  specimen  edere  statuerat  Deus.  Fuerat  Elisabeth  in  flore  aetatis  sterilis:  iam  senectus  etiam  foecundis  mulieribus  uterum  claudit.  Ergo  in  duobus  obstaculis  duplex  apparet  divinae  virtutis  miraculum,  idque  in  eum  finem,  ut  dominus  quasi  extenta  e  coelo  manu  prophetam  a  se  missum  testetur.  Nascitur  quidem  ex  terrenis  parentibus  mortalis  homo,  sed  supernaturalis,  ut  ita  loquar,  modus  non  secus  illum  commendat,  ac  si  e  coelo  delapsus  esset.  9.  Secundum  consuetudinem  sacerdotii.  Suffitum  bis  quotidie,  mane  scilicet  et  vesperi,  accendere  lex  iubebat.  Quod  autem  sortiebantur  inter  se  sacerdotes,  id  instituerat  David,  quemadmodum  prius  retulimus:  ergo  quod  hic  de  suffitu  habetur,  lex  Dei  nominatim  mandabat.  Reliqua  a  Davide  profecta  erant,  ut  singulae  familiae  vices  suas  haberent,  quanquam  nihil  nisi  ex  legis  praescripto  instituerat  David:  formam  enim  tantum  ostenderat,