52:108  caeremonias  adhuc  urgent:  quasi  non  esset  per  ipsum  nobis  parta  absolutio.  Restituunt  enim  chirographo  suum  vigorem,  ut  nos  adhuc  teneat  obnoxios.  Est  igitur  haec  vere  theologica  ratio,  ad  probandam  caeremoniarum  abrogationem  :  quoniam  si  Christus  nos  plene  redemit  a  reatu,  memoriam  quoque  obligationis  tollere  debuit,  quo  pacatae  sint  ac  tranquillae  conscientiae  coram  Deo.  Sunt  enim  haec  duo  annexa.  Quum  varie  hunc  locum  exponant  interpretes,  nemo  est  qui  mihi  satisfaciat.  Alii  simpliciter  de  lege  morali  Paulum  loqui  putant:  sed  falso.  Nam  decreta  vocare  solet  Paulus  illam  partem,  quae  in  caeremoniis  est  sita:  ut  in  epistola  ad  Ephesios,  et  paulo  post.  Praesertim  tamen  locus  ad  Ephesios  (2,  15)  convincit,  de  caeremoniis  Paulum  hic  loqui.  Melius  itaque  alii  qui  ad  caeremonias  restringunt:  sed  in  eo  errant  ipsi  quoque,  quod  rationem  non  addunt  cur  vocetur  chirographum,  vel  potius  diversam  a  vera  assignant:  nec  rite  hanc  similitudinem  accommodant  contextui.  Est  autem  ratio,  quod  caeremoniae  omnes  mosaicae  confessionem  aliquam  reatus  secum  habebant,  quae  ipsarum  cultores  quasi  arctiore  vinculo  coram  iudicio  Dei  adstringeret.  Exempli  gratia,  ablutiones  quid  aliud  erant,  quam  sordium  testimonium?  Quoties  victima  aliqua  immolabatur,  nonne  populus,  qui  adstabat,  intuebatur  illic  mortis  suae  imaginem?  Nam  quum  homines  in  suum  locum  substituerent  innoxium  animal,  confitebantur  ea  se  morte  dignos  esse.  Denique  quot  illic  erant  ritus,  tot  erant  spectacula  reatus  hominum  et  chirographa  obligationis.  Si  quis  obiiciat,  fuisse  sacramenta  gratiae  Dei:  quemadmodum  hodie  nobis  est  baptismus,  et  eucharistia:  responsio  facilis  est.  Duo  enim  in  caeremoniis  veteribus  sunt  consideranda:  quod  tempori  congruebat,  et  deinde  quod  homines  ducebat  ad  regnum  Christi.  Quidquid  tunc  agebatur,  nihil  prae  se  ferebat  aliud  quam  obligationem.  Gratia  quodammodo  suspensa  erat  usque  ad  Christi  adventum.  Non  quod  ab  ea  excluderentur  patres,  sed  non  habebant  praesentem  eius  ostensionem  in  suis  caeremoniis.  Nihil  enim  videbant  praeter  sanguinem  pecudum  in  sacrificiis:  in  ablutionibus  nihil  praeter  aquam.  Ergo  quoad  praesentem  conspectum,  manebat  reatus  :  imo  caeremoniae  ipsae  reatum  obsignabant.  In  hunc  modum  loquitur  etiam  apostolus  in  tota  epistola  ad  Hebraeos:  quia  Christum  ex  adverso  caeremoniis  opponit.  Nunc  autem  quid?  Filius  Dei  morte  sua  non  tantum  nos  liberavit  a  mortis  condemnatione,  sed  quo  absolutio  certior  foret,  caeremonias  illas  abrogavit,  ne  quod  exstaret  monumentum  obligationis.  Haec  est  plena  libertas,  quod  sanguine  suo  delevit  Christus  non  tantum  peccata  nostra,  sed  omne  chirographum  quod  nos  Dei  iudicio  obnoxios  testari  posset.  Erasmus  in  versione  sua  turbavit  contextum  Pauli,  dum  posuit,  quod  erat  nobis  contrarium