51:108  en  son  troupeau:  puis  qu'il  nous  a  conioints  en  son  nom,  et  que  nous  l'invoquons  d'une  bouche  nostre  Pere,  qu'il  faut  bien  que  nous  ayons  fraternite  ensemble.  Que  si  nous  desirons  d'estre  advouez  de  luy  pour  ses  enfans,  que  nous  facions  valoir  ceste  adoption  par  laquelle  il  nous  a  choisis,  tellement  que  nous  declarions  sans  feintise  et  par  effect  que  nous  desirons  de  monstrer  que  nous  tenons  pour  freres  ceux  que  Dieu  a  ainsi  recueillis  en  sa  maison  et  en  son  Eglise.  Voila  donc  ce  que  nous  avons  a  retenir  de  ce  passage.  Et  ainsi  n'usons  plus  de  ces  excuses  frivoles  pour  dire,  O  ie  ne  scay  qui  est  cestui-ci,  ie  ne  le  cognoy  point.  Et  cestui-la  n'est  point  cognu  de  Dieu?  Cependant  tu  ne  daignes  pas  ouvrir  les  yeux  pour  contempler  celuy  qui  est  ton  image,  mesmes  que  Dieu  tient  pour  l'un  de  ses  enfans,  et  tu  diras  que  tu  ne  le  cognois  point.  Cependant  voila  Dieu  qui  daigne  bien  ietter  sa  veue  sur  nous  qui  sommes  tant  miserables,  voire  luy  qui  a  une  maieste  si  haute  et  si  terrible  qu'il  faut  que  les  Anges  de  paradis  tremblent  devant  avec  toute  humilite.  Voila  donc  le  Dieu  souverain  qui  regarde  ici  bas  sur  nous  qui  ne  sommes  que  poures  vers  de  terre  et  pourriture:  et  mesmes  il  ne  se  contente  point  de  dire,  Ie  vous  cognois:  mais  il  proteste,  Ie  vous  adopte  pour  mes  enfans,  que  vous  soyez  ma  facture,  que  vous  soyez  mes  heritiers,  que  vous  soyez  comme  mes  membres:  Dieu  parlera  ainsi,  et  nous  serons  si  pleins  d'orgueil  et  de  fierte  que  nous  mespriserons  ceux  qui  sont  semblables  a  nous,  ou  qui  vaudront  beaucoup  mieux  le  plus  souvent.  Ainsi  donc  qui  est-ce  qui  portera  un  tel  orgueil?  Bref,  ceux  qui  font  ainsi  des  estranges  pour  se  retirer  de  leurs  prochains,  et  qui  ne  veulent  nullement  communiquer  avec  eux,  ils  meritent  bien  d'estre  effacez  du  livre  de  vie,  et  que  Dieu  les  trace  et  les  racle,  et  qu'il  les  livre  en  la  possession  du  diable  qui  est  leur  pere,  d'autant  qu'il  a  este  homicide  des  le  commencement  et  plein  de  cruaute.  Voila  donc  en  somme  ce  que  nous  avons  a  retenir,  et  comment  il  nous  faut  practiquer  ceste  doctrine,  ou  sur  tout  les  domestiques  de  la  Foy  nous  sont  recommandez.  Et  ainsi  que  nous  monstrions  quand  Dieu  nous  a  daigne  appeler  a  soy,  que  nous  prisons  plus  ceste  grace  et  cest  honneur-la  que  tous  les  biens  du  monde.  Et  que  par  ce  moyen  nous  monstrions  aussi  que  nous  avons  affection  fraternelle  pour  bien  faire  a  ceux  qui  ont  faute  de  nous,  et  selon  le  moyen  que  Dieu  nous  aura  donne,  et  la  mesure  de  nostre  faculte.  Or  la  dessus  sainct  Paul  dit  que  les  Galatiens  devoyent  regarder  qu'il  leur  a  escrit  une  grande  lettre  de  sa  main.  Et  c'est  pour  les  rendre  tant  plus  attentifs  quand  ils  verront  le  soin  que  il  a  eu  de  leur  salut.  Car  il  ne  prise  pas  ici  la  longueur