27:108  reiette  aussi,  et  le  Pere  qui  m'a  envoye.  Voila  donc  une  rebellion  toute  manifeste  contre  Dieu,  si  nous  desdaignons  d'ouyr  sa  parolle,  quand  elle  nous  est  preschee  par  les  hommes,  et  de  l'ouyr  en  telle  humilite  comme  s'il  descendoit  a  nous,  et  plus  que  s'il  nous  envoyoit  des  Anges  du  ciel.  C'est  ce  que  Moyse  a  ici  voulu  monstrer.  Or  en  la  fin  il  dit  qu'ils  seront  rassasier,  et  qu'ils  seront  nourris,  quand  ils  auront  ainsi  observe  les  commandemens  de  Dieu.  Nous  avons  deux  poincts  a  noter  en  ce  passage  pour  conclusion.  Le  premier  c'est,  que  nostre  Seigneur  monstre  qu'il  ne  se  contentera  point  d'avoir  donne  maigrement  a  son  peuple  ce  qui  luy  est  necessaire:  mais  qu'il  le  remplira  de  biens,  et  qu'il  en  sera  rassasie.  Voila  pour  un.  Le  second  est,  de  revenir  a  ce  que  nous  avons  desia  touche  par  ci  devant:  que  Dieu  n'a  pas  laisse  de  conduire  son  peuple  plus  loin,  combien  qu'il  ne  luy  parlast  que  des  biens  temporels,  et  qui  concernent  ceste  vie  caduque.  En  premier  lieu  donc  cognoissons,  que  Dieu  non  seulement  nous  donne  et  distribue  ce  qu'il  cognoist  nous  estre  necessaire,  mais  il  s'eslargist  et  estend  ses  richesses  plus  loin,  quand  il  use  de  superabondant.  Et  de  faict,  nous  le  voyons.  Car  quant  est  de  la  necessite  de  nature,  que  nous  faudroit-il  sinon  du  pain  et  de  l'eau?  Or  Dieu  adiouste  le  vin  pour  conforter,  et  resiouyr  le  coeur  de  l'homme,  comme  il  est  dit  au  Pseaume.  Et  puis  on  voit  qu'il  nous  veut  resiouyr  en  toutes  sortes,  quand  il  envoyera  tant  de  choses  en  ce  monde,  qui  sont  pour  delecter  les  hommes:  ce  sont  autant  de  tesmoignages  de  la  liberalite  de  Dieu,  quand  non  seulement  il  provoit  a  ce  dont  nous  ne  pouvons  nous  passer,  mais  qu'il  y  adiouste  de  superabondant  beaucoup  de  biens  qui  nous  servent  de  plaisir.  Or  par  cela  nous  denons  estre  tant  plus  incitez  a  son  amour.  Et  cela  nous  doit  servir  comme  d'ailes  pour  voler  a  luy.  Mais  au  contraire  si  Dieu  nous  rassasie,  nous  ne  pouvons  nous  tenir  de  nous  saouler  ainsi  que  des  bestes,  tellement  que  nous  sommes  appesantis  en  ce  monde.  Ie  ne  parle  point  seulement  des  yvrognes  qui  gourmandent  tant  qu'il  n'y  a  plus  ne  sens  ni  raison  en  eux:  mais  ie  parle  de  ceux  qui  aiment  leurs  delices:  que  s'ils  ont  du  superabondant,  ils  ne  se  peuvent  tenir  d'exceder  mesure:  et  la  dessus  ils  s'endorment:  qu'au  lieu  d'estre  incitez  de  venir  a  Dieu,  ils  en  recullent,  ou  bien  ils  se  plaisent  en  leurs  delices,  et  s'y  baignent,  et  s'oublient  ie  ne  say  comment.  Ainsi  notons  bien,  que  si  nostre  Seigneur  nons  rassasie,  ce  n'est  pas  pour  nous  donner  occasion  d'intemperance  :  mais  c'est  afin  que  nous  soyons  plus  enflammez  en  son  amour,  veu  qu'il  ne  nous  traitte  point  comme  un  homme  feroit  un  serviteur  ou  quelques  uns  qu'il  auroit  a  loage:  mais  comme  ses  propres  enfans,  et  qu'il  ne  nous  espargne  rien.