22:108  Le  maistre.  Pourquoy  appelles  tu  Dieu  ton  pere  ceieste?  Lenfant.  Affin  que  ma  pensee  s'appuye  mieux  et  se  confye  a  son  ayde  paternel  et  celeste.  Le  maistre.  Pourquoy  pries  tu  Dieu?  Lenfant.  Affin  quil  nous  donne  toutes  choses  lesquelles  nous  sont  bonnes  et  necessaires  et  quil  nous  delivre  de  toutes  miseres  et  langueurs.  Le  maistre.  Quel  bien  demandes  tu  premierement?  Lenfant.  Le  bien  celeste.  Le  maistre.  Quel  est  il?  Lenfant.  En  lamour  et  cognoissance  du  Pere  celeste.  Le  maistre.  De  quelles  parolles  uses  tu  en  priant?  Lenfant.  Ton  nom  soit  sanctifie.  Ton  royaulme  advienne.  Ta  volunte  soit  faicte  ainsi  en  la  terre  comme  au  ciel.  Le  maistre.  Par  quel  moyen  est  sanctifie  le  nom  de  Dieu  envers  les  hommes?  Lenfant.  Par  la  congnoissance  de  Dieu  laquelle  Levangile  nous  donne  et  aussi  par  oraison  laquelle  est  conioincte  avecques  foy  et  constance.  Le  maistre.  Tu  as  bien  dict  car  en  cecy  est  le  premier  fruict  de  Levangile.  Or  comment  est  ce  que  le  royaulme  de  Dieu  nous  advient?