58:107  107  SEPTIEME  SERMON  108  qu'il  n'a  point  une  foy  bien  resolue:  mais  d'autant  qu'il  chancele  et  qu'il  varie,  voila  en  quoy  il  monstre  qu'il  ne  s'est  pas  fie  en  Dieu  comme  il  devoit.  Or  donc,  nous  voions  maintenant  la  faute  d'Isaac:  et  tant  plus  devons  nous  estre  advertis  (comme  nous  avons  desia  declare)  qu'en  tous  les  obiects  que  nous  aurons,  pour  nous  espouvanter,  que  nous  facions  cest  honneur  a  Dieu,  qu'il  est  suffisant  pour  y  remedier:  que  nous  l'invoquions,  et  qu'apres  nous  usions  des  moyens  qu'il  nous  permettra,  et  lesquels  il  approuve,  sans  passer  nos  bornes  ni  a  dextre  ni  a  senestre.  Isaac  donc  n'a  point  fait  du  tout  tort  a  ceux  du  pais,  mais  il  a  fait  tort  a  Dieu,  qui  est  beaucoup  plus.  Et  au  reste,  encore  n'est-il  pas  pleinement  a  excuser,  quand  il  concoit  un  tel  iugement  de  sa  teste:  car  encores  qu'il  n'y  eust  point  de  crainte  de  Dieu,  ni  de  vraye  religion  au  pais,  si  est-ce  que  la  vraye  charite  n'est  point  soupsonneuse.  On  ne  lui  avoit  point  encore  fait  ne  moleste  ne  iniure:  faloit-il  donc  que  du  premier  coup  il  les  condamnast?  Pour  ceste  cause  Dieu  permet  que  le  mal  revient  sur  lui:  et  cependant  il  use  d'une  singuliere  misericorde:  car  on  lui  pouvoit  ravir  sa  femme,  comme  on  avoit  fait  a  son  pere.  Voila  un  Roy  qui  est  au  pais  de  Gerar,  mais  cependant  Dieu  le  retient  qu'il  ne  fait  point  aucune  fascherie  a  Isaac,  voire  sachant  bien  que  il  n'y  avoit  pas  telle  vertu  en  lui  qu'en  son  pere  Abraham,  ainsi  que  desia  nous  avons  monstre:  et  voila  pourquoy  aussi  Dieu  le  previent:  quand  il  a  delibere  d'aller  en  Egypte,  il  le  retire  comme  par  force,  et  lui  defend  de  sortir  de  la  terre  qu'il  lui  avoit  promise.  Nous  avons  declare,  que  selon  la  mesure  que  Dieu  nous  a  donnee,  aussi  il  nous  esprouve.  Il  besongne  donc  en  tous  hommes  comme  en  des  boutiques  diverses,  et  par  instrumens  qui  ne  sont  pas  de  mesme  faculte.  Et  ainsi,  voila  Isaac  qui  a  este  espargne  pour  un  coup  :  mais  aussi  nous  voions  comme  Dieu  lui  a  este  pitoiable  et  humain,  quand  il  ne  lasche  point  la  bride  au  Roy  Abimelech,  de  faire  ce  qui  avoit  este  fait  a  Abraham,  Car  si  nous  demandons  pourquoy  il  est  avenu  un  coup,  et  qu'il  n'est  pas  avenu  l'autre.  E  est  certain  que  Dieu  a  gouverne  cela  par  son  conseil  admirable:  car  selon  qu'il  lasche  la  bride  aux  hommes,  il  est  certain  qu'ils  passent  leurs  bornes.  Et  il  est  dit  notamment  qu'il  tient  les  coeurs  des  Roys  en  sa  main,  qu'il  les  fait  couler  ca  et  la  ou  il  veut.  Ainsi  donc,  il  faut  que  nous  concluons  que  le  coeur  du  Roy  de  Gerar  a  este  retenu  qu'il  n'a  point  appete  Rebecca:  autrement,  il  eust  este  suiet  a  telle  concupiscence,  que  le  povre  Isaac  en  eust  este  tormente  iusques  au  bout,  et  qu'il  eust  hume  de  terribles  angoisses:  mais  (comme  nous  avons  dit)  Dieu  qui  est  fidele,  selon  qu'il  cognoist  la  faculte  des  siens,  il  les  espargne,  ou  il  les  examine  plus  au  vif.  Et  au