44:107  107  IN  HAGGAEUM  108  ut  fere  obbrutescerent.  Caeterum,  etiamsi  hoc  non  venerit  Herodi  in  mentem,  certe  diabolus  data  opera  voluit  hanc  fallacem  umbram  obtrudere  Iudaeis,  ut  desinerent  erigere  mentes  suas  ad  sperandum  Christi  adventum,  sicuti  tempus  tunc  proprinquum  erat.  Deus  enim  poterat  statim  ab  initio  templum  magnificum  exstruere:  quemadmodum  reditum  permisit  populo  suo,  ita  simul  potuit  et  animos  dare,  et  suggerere  materiam,  ut  templum  posterius  vel  aequaret  vel  etiam  superaret  templum  Solomonis.  Atqui  edicto  prohibuit  Cyrus  ne  in  tantam  altitudinem  assurgeret  templum:  deinde  aliquid  etiam  diminuit  ex  longitudine  :  cur  hoc  factum  est?  Deinde,  cur  Darius,  qui  tamen  liberaliter  adiuvit  Iudaeos  et  qui  sumptibus  non  pepercit  ut  templum  exstruerent:  cur  uterque  rex,  quum  tamen  impulsus  esset  spiritu  Dei,  non  permisit  aedificari  templum  eodem  splendore,  quo  prius  erectum  fuerat?  Sed  hoc  non  contigit  sine  admirabili  Dei  consilio.  Scimus  enim  quam  crassi  fuerint  Iudaei.  Et  eodem  etiam  vitio  apostolos  videmus  fuisse  implicitos,  quia  non  aliud  quam  terrenum  Christi  regnum  sperabant.  Si  ergo  aeque  opulentum  fuisset  templum,  et  si  regni  etiam  species  fuisset  qualis  ante  fuerat,  Iudaei  acquievissent  in  illis  externis  pompis:  ita  contemptus  fuisset  Christus,  imo  pro  nihilo  habita  fuisset  spiritualis  Dei  gratia.  Quum  ergo  adeo  propensi  essent  ad  terrenam  felicitatem,  oportuit  ipsos  expergefieri,  et  Dominus  adiuvit  eorum  infirmitatem  quum  passus  non  est  erigi  tale  templum.  Per  Herodem  vero  quum  iam  instaret  Christi  manifestatio,  quod  passus  est  templum  illud  adulterinum  construi,  indicium  magis  vindictae  fuit  ad  puniendam  ingratitudinem,  quam  testimonium  favoris:  adulterinum  dico,  quia  splendor  ille  nunquam  probatus  est  Deo.  Fuit  enim  profanatio  veri  templi  potius  quam  ornatus,  quod  Herodes  consumpsit  magnos  thesauros  in  illa  structura.  Stulte  igitur  commemorant  etiam  aliqui  quidquid  erogavit  Helena  Adiabenorum  regina,  putant  hoc  modo  aliqua  ex  parte  fidem  vaticinio  fuisse  factam.  Sed  Satan  potius  lusit  talibus  imposturis  ac  praestigiis,  ut  abduceret  piorum  animos  a  spiritualis  templi  ornatu.  Sed  cur  ergo  propheta  hic  aurum  et  argentum  nominat?  nempe  facit  hoc  communi  et  recepto  more.  Quoties  enim  de  regno  Christi  loquuntur,  delineant  vel  adumbrant  eius  splendorem  figuris  quae  sacculo  suo  conveniunt.  Iesaias  dum  vaticinatur  de  ecclesiae  restitutione,  praedicat  ecclesiam  fore  totam  argenteam,  vel  auream  vel  quae  fulgeat  lapidibus  pretiosis  et  praecipue  cap.  60  celebrat  magnificentiam  illius  templi,  quasi  undique  gentes  adducturae  essent  in  sacrificium  quidquid  ubique  pretiosum  erat.  Sed  figurate  loquutus  est  Iesaias,  quemadmodum  alii  prophetae.  Sic  ergo  quod  nunc  legimus  de  auro  et  argento  debet  exponi,  ut  anagoge  fiat  ad  regni  Christi  na-