7:106  stance  de  son  corps?  Semblablement,  en  un  autre  lieu,  le  mesme  Apostre  parlant  de  la  dignite  et  noblesse  des  Iuifz,  dit  entre  autres  choses,  qu'ilz  sont  les  successeurs  et  la  lignee  des  peres,  desquelz  est  descendu  Christ  selon  la  chair  (Rom.  9,  5).  Ie  laisse  beaucoup  d'autres  passages:  comme  quand  il  dit  que  Dieu  a  este  manifeste  en  chair  (1  Tim.  3,  16):  item  qu'il  a  souffert  en  humilite  de  la  chair  (1  Pierre  4,  1).  Semblablement  quand  sainct  Iehan  dit,  que  la  Parolle  a  este  faicte  chair  (Iehan  1,  14):  et  sur  tout  que  tant  souvent  luymesme  s'attribue  ce  tiltre  de  filz  d'homme,1)  et  autres  [page  117]  semblables:  pource  qu'ilz  seroyent  superfluz  apres  ces  deux  tant  notables  que  i'ay  allegues.  Ie  me  contenteray  donc  d'amener  ceux  lesquelz,  avec  ce  qu'ilz  prouvent  mon  intention,  declarent  quant  et  quant,  combien  il  nous  est  necessaire  de  croire  que  nostre  Seigneur  Iesus  a  vestu  et  prins  vrayement  une  nature  commune  avec  nous,  quand  il  a  este  faict  homme.  L'Apostre  en  l'Epistre  aux  Hebrieux  (2,  16)  prend  un  bel  argument  pour  amplifier  l'amour  qu'il  nous  a  portee,  de  ce  qu'il  n'a  pas  prins  la  nature  des  Anges,  mais  la  nostre.  Si  nous  recevons  la  phantasie  de  ces  malheureux:  ceste  grace  et  bonte  inestimable  du  Seigneur  Iesus  seroit  abolie  de  nostre  memoire,  que  nous  ne  congnoistrions  plus  qu'il  nous  a  plus  honore  que  les  Anges.  Il  dit  apres,  que  par  le  moyen  de  la  communication  qu'il  a  avec  nous,  en  sa  chair  et  son  sang,  il  se  nomme  nostre  frere,  et  a  vraye  fraternite  avec  nous  (Hebr.  2,  ll).  De  la  nous  avons  a  conclurre,  que  le  plus  grand  bien  que  nous  puissions  avoir,  nous  seroit  oste,  si  Iesus  Christ  ne  communiquoit  avec  nous  en  chair  et  en  sang.  Car  comment  serions  nous  enfans  de  Dieu  sans  estre  ses  freres?  Or  l'Apostre  dit,  que  nous  obtenons  un  tel  bien  entant  qu'il  est  conioinct  avec  nous  en  une  mesme  nature,  [page  118]  et  non  autrement.  Il  adiouste  puis  apres,  qu'il  estoit  convenable  qu'il  fust  semblable  a  ses  freres,  pour  estre  fidele  intercesseur  et  pitoyable  (Hebr.  2,  17).  Dont  il  deduit  une  singuliere  consolation,  que  nous  n'avons  point  un  Advocat  qui  ne  puisse  supporter  noz  infirmites,  veu  que  luymesme  en  a  este  tente,  estant  fait  semblable  a,  nous,  excepte  peche  (Hebr.  4,  15).  Puis  qu'en  la  similitude  qu'il  met  entre  nous  et  Iesus  Christ,  il  ne  faict  que  ceste  seule  exception,  du  peche:  il  s'ensuit  qu'au  reste  il  nous  est  semblable,  attendu  mesme  que  notamment  il  parle  de  la  nature  humaine.  En  ces  passages  non  seulement  nous  voyons  comment  nostre  Seigneur  Iesus  est  vrayement  nostre  frere  en  union  d'une  mesme  humanite:  mais  aussi  l'utilite  qui  nous  en  revient:  de  laquelle  nous  despouillent  1)  Filz  de  l'homme  1566  suiv.