58:106  qu'il  n'y  avoit  pas  de  crainte  de  Dieu  au  pais:  non  pas  qu'il  y  eust  une  impiete  si  enorme,  qu'on  ne  seust  que  c'estoit  de  bien  et  de  mal:  car  nous  voions  comme  parle  le  Roy  du  pais:  mais  d'autant  que  la  vraye  religion  ne  dominoit  point  la,  et  qu'il  n'y  avoit  qu'idolatrie,  il  sembloit  bien  a  Isaac  que  tout  y  estoit  confus.  Car  de  fait  iamais  nous  n'aurons  une  regle  certaine,  pour  cheminer  en  equite  et  droiture,  que  nous  n'aions  la  Maieste  de  Dieu  presente,  et  que  nous  ne  soions  retenus  par  icelle,  comme  d'une  bride.  Or  quand  nous  ne  savons  que  c'est  de  Dieu,  que  nous  n'avons  que  des  speculations  confuses,  encores  que  nous  aions  quelque  honnestete,  combien  que  nous  aions  discretion  de  bien  et  de  mal,  et  que  nous  ne  soions  point  adonnez  a  nuire,  a  faire  tort  et  violence:  si  est-ce  qu'il  n'y  a  point  de  fermete  en  nous.  Car  (comme  i'ay  dit)  on  ne  peut  bastir  sur  autre  fondement,  pour  avoir  un  edifice  ferme  et  stable,  sinon  que  la  crainte  de  Dieu  aille  devant.  Isaac  donc  pouvoit  avoir  quelque  occasion  de  crainte,  et  de  prevenir  le  danger:  mais  cependant  il  devoit  cognoistre  que  vaut  la  sauvegarde  de  Dieu,  telle  qu'elle  lui  avoit  desia  este  monstree  par  experience.  Car  s'il  eust  este  bien  avise,  il  ne  falloit  pas  qu'il  attendist  que  Dieu  eust  son  bras  estendu,  pour  le  secourir  d'une  facon  visible  :  car  il  lui  avoit  este  dit,  Ne  crain  point  :  car  ie  suis  avec  toy:  ie  suis  ton  loier  tresample.  Il  est  vray  que  cela  ne  lui  avoit  pas  este  dit  expressement:  mais  ce  qui  a  este  dit  a  son  pere,  estoit  aussi  bien  pour  lui:  car  il  estoit  heritier  de  ceste  promesse-la.  Quand  donc  il  ne  s'attend  pas  a  Dieu,  en  cela  il  est  redargue  d'infidelite.  Il  est  vray  que  la  Foy  n'empesche  pas  que  nous  n'apprehendions  les  dangers  dont  nous  sommes  environnez:  car  la  foy  n'est  point  pour  nous  rendre  insensibles.  Et  ce  ne  seroit  nulle  vertu  a  nous  d'invoquer  Dieu,  sinon  que  nous  fussions  incitez,  voiant  que  nous  ne  pouvons  pas  nous  passer  de  son  aide:  mais  il  y  a  grande  difference,  si  la  crainte  est  telle,  qu'elle  nous  face  destourner  du  droit  ehemin:  ou  bien  que  ce  nous  soit  comme  un  aiguillon  pour  nous  inciter  d'aller  a  Dieu.  Si  Isaac  eust  pense  en  soy,  II  faut  que  ie  me  retire  vers  mon  Dieu:  car  ie  n'ay  autre  refuge  que  de  recourir  a  son  aide:  il  me  l'a  promise,  et  ie  l'ay  mesme  desia  experimentee  au  besoin.  Il  faut  donc  que  maintenant  sa  verite  se  declare  encore,  et  se  monstre  envers  moy.  Si  Isaac  en  fust  la  venu,  il  est  certain  que  sa  foy  eust  este  tant  mieux  examinee:  et  sa  crainte  eust  monstre  comme  il  s'estoit  fortifie  en  Dieu,  estant  debile  en  soy:  mais  quand  il  est  saisi  de  peur,  et  que  la  dessus  il  prene  son  conseil,  lequel  Dieu  condamne:  la  il  ne  se  conforme  pas  au  devoir  d'homme  fidele.  Quand  donc  Isaac  y  va  ainsi,  il  monstre  qu'il  craint,  d'autant  qu'il  n'est  point  assez  addonne  a  la  Parole  de  Dieu,  et