31:106  sepulcrum  decidant,  a  quo  putabant  se  longissime  distare.  Hic  ergo  subita  et  inopinata  mutatio  nobis  describitur,  qua  Deus  ubi  visum  est,  res  turbatas  in  ordinem  restituit.  Quoties  ergo  extra  omne  discrimen  alte  volitant  impii,  fidei  oculis  contemplemur  quod  illis  paratum  est  sepulcrum:  certoque  persuasi  simus,  Dei  manum,  licet  occulta  sit,  prope  instare,  quae  eorum  cursum,  quo  coelum  petebant,  ad  inferos  momento  retorqueat.  Nomen  Hebraicum  n/IXt^  quod  dubium  erat,  per  infernum  reddere  non  dubitavi.  Tametsi  enim  non  displicet  quod  alii  vertunt  Sepulcrum  :  certum  tamen  est,  notari  aliquid  a  propheta  ultra  communem  mortem,  alioqui  nihil  de  sceleratis  diceret,  quod  non  etiam  promiscue  caderet  in  omnes  fideles,  sicuti  ergo  non  simpliciter  de  aeterno  interitu  loquitur,  ita  etiam  sub  metaphora  sepulcri,  impios  omnes  perituros  significat  et  exitialem  illis  fore  suam  confidentiam,  qua  per  omne  nefas  ad  calcandam  iustitiam  et  innoxios  opprimendos  conscendunt.  Descendunt  quidem  et  fideles  in  sepulcrum,  sed  non  illo  violento  impulsu,  qui  eos  sine  spe  exitus  demergat,  quin  potius  in  sepulcro  reconditi,  spe  tamen  in  coelo  habitant.  19.  (Quia  non  in  finem.)  Confirmatio  est  prioris  sententiae,  quod  Deus  non  deseret  in  perpetuum  inopes  et  afflictos.  Quibus  verbis  significat,  videri  quidem  posse  ad  tempus  derelinqui.  Quare  sciamus  nobis  hac  lege  Dei  auxilium  promitti,  ut  tamen  non  praeveniat  nostras  afflictiones  :  sed  ubi  nos  diu  cruce  domuerit,  tandem  succurrat.  Et  de  spe  vel  exspectatione  nominatim  loquitur  David,  ut  nos  ad  preces  hortetur.  Ideo  enim  ad  nostras  aerumnas  connivet  Deus,  quia  vult  precibus  nostris  expergefieri,  nam  ubi  vota  nostra  exaudit,  quasi  memor  nostri  esse  incipiat,  manum  suam  potentia  instructam  ad  nos  iuvandos  porrigit.  Sed  iterum  repetit  David  non  statim  id  fieri,  ne  desinamus  bene  sperare,  quamvis  non  statim  arrideat  prosper  eventus.  20.  Surge  Iehova,  ne  roboretur  homo:  iudicentur  gentes  in  conspectu  tuo,  21.  Impone  Iehova  terrorem  ipsis,  ut  cognoscant  gentes  quod  homo  sint.  Selah.  20.  (Surge  Iehova.)  Surgendi  verbum  non  ad  Deum,  sed  ad  externam  rei  speciem  et  sensus  nostros  refertur.  Quia  non  sentitur  Deus  suorum  liberator,  nisi  quum  oculis  nostris,  velut  pro  tribunali  sedens  apparet.  Ratio  additur,  quae  Deum  ad  vindicandas  suorum  iniurias  inducat,  ne  scilicet  roboretur  homo:  quia  ipso  surgente,  omnem  impiorum  ferociam  protinus  concidere  necesse  est.  Unde  enim  fit  ut  improbi  vel  tam  audacter  insolescant,  vel  tantum  valeant  ad  nocendum,  nisi  quia  Deus  quiescit,  fraenumque  laxat?  Simul  vero  ac  signum  iudicii  sui  ostenderit,  solo  nutu  compescet  superbos  eorum  tumultus,  viresque  franget.  Docemur  autem